市場徐想：曼聯上市注意風險
曼聯計劃來港上市，最開心嘅梗係佢班粉絲。不過講真，如果曼聯上市，估值約17億英鎊，差唔多係全球估值最高嘅球隊。同○五年比，足足高出一倍。再睇真少少，曼聯上市全因當日以蛇吞象形式買入，大部分係對沖基金嘅高息貸款，更以球會資產作抵押，搞到曼聯周身債，債台高築，唔集資還債，唔搞搞佢，點算好？
大家要記住，買一個品牌即係買緊佢嘅溢價，例如可口可樂係一個有價值嘅品牌，而佢嘅可樂喺邊處製造都有一定程度上嘅保證，但係買曼聯，買嘅係佢哋隊波，領隊又話要退休，鋼門又掛靴，咁鬼多要員風險集於一身，都咪話唔大鑊。諗諗吓，都係做粉絲好過做股東，全因變心容易。好過做咗股東之後，情難捨，咁就仲大鑊。