期指攻略：順勢追沽先睇21724
美股反彈一瞬即逝，道指跌穿11,900點，展望QE2仲有兩星期玩完，股市睇實下星期聯儲局議息，主席伯南克對經濟及就業市場疲弱有何對應，好大機會再以沽貨來逼政府就犯，再出QE3，令短期市況平添變數。
昨日大利市機是紅海一片，滬綜指跌穿2,700點技術支持，恒指一開已在22,048點，低於三月低位22,123點，意味着淡友在22,000至25,000點接近三季的上落市中取得最終勝利，恒指最終跌390點，收報21,953點。
原先筆者留意好友會否作出短暫的反撲，但裂口低開後現貨及期貨即市波幅唔算大，分別只有190.5點及211點，似乎掌握大局的淡友不急於一時，期指收報21,941點，跌299點，較理論值21,955低水14點。
昨日期指一開22,060點，之後曾試22,077點，連上次低位22,085點都未能觸及，跌勢已成，筆者按破位追沽的策略，以平均成本22,035點沽貨。第一站目標睇21,724點，如果收市企穩22,085阻力，筆者會先止蝕。無論如何，下星期議息前，筆者打算繼續順勢逢高試沽策略，可是基於VIX指數上升，看官要量力而為，以平日注碼的三分之一為上限。
