股海實戰：雨潤力足跑贏大市

港股過去十一個交易日有十日低收，唔信邪揸期指嘅真係痛不欲生，奈何今次跌市係全球性，港股難獨善其身。短線恒指上唔番三月低位，即係話有比日本大地震更震撼嘅壞消息跟尾，唔習慣做淡友者，宜繼續「戒急用忍」！

新秀麗（01910）首日掛牌撞啱跌市，股價收報13.38元，較招股價低7.7%，非戰之罪。嚟緊仲有幾隻新股擬展開招股活動，變數甚多。睇嚟次季最幸運嘅新股係米蘭站（01150），趕得切喺港股跌穿大半年橫行區前掛牌，仲要做埋「新股王」，真係時也命也！

前日尾市大笨象（00005）落到今年以來嘅重要支持位78元，見到兩千多個買盤力挺，可惜最終還是不堪一擊，尋日裂口低開，一度低見76.55元，成交30.6億元。正所謂「跌市莫估底」，阿莊亦冇意以身犯險。此外，騰訊（00700）亦成落水狗，股價跌穿兩舊水，收報197.1元，跌3%，撈底尚未係時候。

講起藍籌，唔爭在睇埋隻中移（00941）。尋日中移嘅認股證成交按日增加六成多，達7億元，集中喺認購證，唔排除好友認為中移股價較硬淨，買定相關購輪博反彈。不過，若然港股今鋪確認破底而下，睇怕中移亦難逃一劫，只係莊家派貨都要些少時間，中移股價可能喺69至70元呆幾日先開殺戒都未定！

資金流走先避風頭

請恕阿莊呢期「口淡淡」，除咗指數走勢着實令人失望之外，美匯表現亦顯示資金有流走迹象，短線避其風頭少沾手藍籌股，係正路嘅做法。

最近國際金融大鱷索羅斯亦開腔，話中國已錯失壓抑通脹嘅機會，經濟正面臨「硬着陸」嘅風險。不過，內地金融界又唔係太悲觀，唔少預測指七、八月A股將觸底回升，理由係六月CPI將見頂，加上今年有「九十周年」概念撐場，中央唔會容許股市出亂子云云。若然同胞們對A股展望預測正確，當前股海「六絕」日子雖然難過，但股友唔使絕望，可將希望放喺第三季中至尾段。

回說尋日異動股，雨潤食品（01068）表現硬淨，以接近全日高位收市，報28.5元，升1.06%，成交2.82億元。內地傳媒報道，端午過後，豬價升勢未改，已升穿○八年高位。由於豬糧價格持續上升，加上生豬供應依然緊張，預期未來一個月雖踏入豬肉消費傳統淡季，惟料豬價仍會持續高企。

除豬價因素外，今年一個較特別嘅因素，係雨潤主要競爭對手雙匯備受瘦肉精事件打擊，「療傷」需時，造就機會讓雨潤搶攻市場佔有率。

競爭對手需時療傷

近日亦有投行就雨潤發表研究報告，繼續唱好。而事實上，本月以來，雨潤股價表現明顯優於大市，已說明大戶取向。基於短期基本因素持續向好，相信股價可繼續跑贏大市，向上主要阻力喺30至32元區域，250日線支持喺26.8元。

戰報

領匯（00823）

錢進於五月二十四日推介嘅領匯續獲資金追捧，尋日高位27.45元，較當日低位24.75元，累升近11%。

長江基建（01038）

阿莊於六月三日推介嘅長江基建果然係防守之選，當日低位37.7元，尋日高位做41.05元，升近9%。