股海實戰：銀基有力再衝高位

內地五月份CPI數據出爐，按年增幅5.5%，喺市場預期之內，由於主要糧食價格仍在上漲，故預期六月份CPI增幅將繼續尋頂，可能超過6%。A股收市後，人行隨即宣布調高RRR，即係話對加息尚留有一手，但若果話緊縮政策會否得到「鬆綁」，則言之尚早！

今年金魚缸「五窮」應驗，「六絕」似乎亦已成定局，下一個問題當然係能否「七翻身」！統計顯示，過去六年港股七月皆升，A股滬綜指則連續三年七月皆升。當然，世事如棋局局新，炒股亦冇一本通書睇到老，只係統計數字可以多個參考意義而已。總而言之，喺未來一個月，有機會係今年兩地金魚缸嘅「轉角」位，此刻宜盡量忍手保留實力，待月尾期指結算過後，後市方向會漸趨明朗。

板塊方面，尋日建材股及內房股都有反彈，其中以水泥股表現最奪目。下半年大量保障房開工，為建材股帶來有力支持，落到咁上下又有大戶上車炒波幅。至於內房股，短炒唔好太貪心，皆因今年內地樓市成交必然縮減，加上喺中央高度關注之下，樓價受壓，喺價、量齊跌之下，內房股下半年銷售數據將不利股價表現。

兒童用品股受捧

尋日另一矚目板塊係兒童用品股受追捧，好孩子（01086）及博士蛙（01698）均逆市高收，升幅分別為5.2%及4.7%，市場揣測係同內地兒童護理產品生產商青蛙王子將在港上市有關。若想二選其一跟炒，論走勢似乎博士蛙較可取。

此外，前日遭大舉拋售嘅長城汽車（02333）及MI能源（01555），股價落到支持區見有大撼大場面，尋日均高收作結，惟料短期仍有爭持，博反彈宜嚴控注碼。

再睇吓業績股。銀基（00886）先前已就末期業績發盈喜，尋日公布截至今年三月底止全年收益22.17億元，增長68%；純利5.85億元，增長47.7%；每股盈利0.4918元，派末期息0.319元，全年派息0.488元，即係話派息比率達到99%，股東們真係財息兼收！尋日股價微跌1%收場，報7.6元，畢竟上月下旬以來股價累升兩成多，好消息後現回吐，咁嘅幅度可以接受。

銀基經營表現理想，只係一點須注意，乃去年度嘅應收貿易款項及應收票據達到7.11億元（前年度為4,328萬元），而截至三月底止手頭現金為3.39億元（前年度末為9.77億元）。隨着業務擴張，公司需要投入更多資源應付發展可予理解，亦可觀察管理層喺控制應收帳款方面的功夫。

息率吸引成賣點

屈指一算，銀基現價往績市盈率降至十五倍，息率6厘，相信估值可為股價帶來支持。內地酒文化源遠流長，加上居民消費能力提升，對品牌酒品嘅需求不斷增加。銀基已喺行頭建立江湖地位，加上估值亦有數得計，料可繼續獲得機構投資者垂青，短線股價整固過後，料派息除淨前尚有力再試衝高位。

戰報

中軟國際（00354）

阿莊於周一推介中軟國際，當日低位2.1元，尋日高位見2.47元，跟佢上車走番轉，已賺近18%。

利信達（00738）

May周一睇中隻利信達繼續有追捧，尋日高見4.27元，以推介日低位3.84元計，已有超過11%進帳。