太子手記：魯連城陪實彤叔顯身價
新世界發展（00017）主席鄭裕彤（彤叔），身邊有位好出名嘅掌櫃魯連城，太子有一排冇見佢，點知尋日喺新礦資源嘅投資者推介會見到佢，今次分拆係由新創建（00659）主導，同魯生嘅直接關連性好細，佢陪埋彤叔、鄭家純一齊出嚟，證明佢好重要囉。
彤叔旗下嘅周大福，密密收集佐丹奴（00709），傳佢會收購成間公司，彤叔就話：「我收購嚟做咩吖，我都唔係做呢行，我係長線投資。」講完冇耐，聯交所就顯示，彤叔喺上個星期二又再以平均價每股7.13元掃1,650萬股，又用成1.176億元，持股量去到18.07%。
彤叔︰股市暫時平穩
呢排個股市唔係好掂，彤叔有冇心水呀？彤叔話，個大市暫時都係平平穩穩啦，睇幾點呢？佢就唔識喇。
魯連城陪彤叔出席新礦資源推介會。（資料圖片）