市場徐想：領匯收購符合定位
領匯（00823）作為全香港首隻房地產信託基金，對股東都算有交代。可惜大眾投資者都當咗領匯係股票咁睇，忘記咗佢嘅穩定性係設立領匯嘅大前提。
領匯以11億港元向南豐集團收購將軍澳商場，呢個商場近坑口港鐵站，同新地（00016）及港鐵（00066）旗下嘅商場連接，每月租金收入420萬元。有人問我，領匯點解買南豐商場，其實好簡單，第一，大型地產發展商唔會睬佢；第二，商場喺市場學都有定位之分，南豐商場屬於「平民化大眾」商場，冇乜大品牌，同領匯溫情屋邨商場形象脗合，從協同效應來講更易見到。
依家嘅領匯，除咗純收租同等派息之外，仲有埋收購概念，成個陣勢又唔同晒，不過買咗南豐廣場只係一個開始，品牌嘅融合，營運上嘅積效提升，同埋有冇真正協同效應，都係有待時間見證。