市場徐想：新海能源動作不斷
市值廿幾億嘅新海能源（00342），近年又配股又收購，不斷有大動作，去年又用6,000萬元人民幣收購聯新能源，整合埋汽車加氣業務。唔好睇輕呢樣嘢，聯新能源佔廣州汽車加氣業務60%市佔率，呢一步棋簡直係「促銷催化劑」，令新海能源有個窗口賣LPG。
收購聯新能源之後，新海可以將加氣業務延伸至廣東省內其他城市。同時間，新海喺另一邊已經申請緊香港氣體註冊公司牌照，諗住喺本港經營LPG銷售業務。
「十二五」規劃下，國家鼓勵發展嘅產業受惠國策，打住環保旗號，經營液化氣業務的新海，近年股價表現靚仔，後續動作值得憧憬。收購聯新之後，又可以借聯新嘅技術再染指四方，隨時畀佢打出一片大江山。