股海實戰：中興通訊又到買貨時間

即月期指結算，恒指尋日收報23,184點，升66點，六月期指理論價高水87點，但現貨成交降至僅508億元，為今年新低，投資者觀望情緒高漲，皆因尋晚美股休市，外圍欠缺方向，加上周內內地及美國分別公布重要經濟數據，此前缸邊友寧可少做少錯，唔做唔錯。

阿莊早前話會睇位吸納嘅中國南車（01766），又再取得大額定單。公司尋日宣布中標合計總額約39.4億元嘅若干重大項目，約佔一○年營業收入的6.1%。消息刺激其股價上揚，高位做7.84元，收報7.78元，升1.83%，成交7,480萬元。本來阿莊想等低啲先出手，但尋日見隻股重上10日線，交投唔錯，所以忍唔住手，以平均價7.7元買入6萬股，先買半注，會繼續睇位買埋另外嗰半注。

MSCI指數系列成分股變動今日生效，由於公布以來相關股份股價已作異動，故尋日大部分新貴股價表現平穩。新股方面，本周華能新能源（00958）、源庫（00394）及龍翔（00935）招股，個人認為龍翔可以關注，一來晒士唔大（發行額2.75億股，一成公開發售，招股價1至1.4元），加上保薦人光大證券往績唔錯（去年保薦嘅中國信貸（08207）便屬一例），可小注一試。

港交所值得關注

除咗呢三隻新股之外，聽聞光大銀行及中信証券都爭取喺本月獲批上市申請，而徐工、鷹普及大潤發亦正積極籌備來港上市。內地市況嚴重缺水、股市表現不濟，但新股市場仍能繼續長做長有，實屬難得，計落咁樣最受惠嘅係港交所（00388），尋日收報170.3元，升0.29%，睇圖160至170元水平係一個較大嘅支持區，中長線值得關注。

喺三隻中資電訊股之中，今年以來表現最好嘅非聯通（00762）莫屬，五月份股價迭創五十二周新高，尋日高位做17.46元，收報17.28元，升2.86%。至少喺第三季度內，從基本面看，見唔到三大形勢有扭轉迹象，即係話聯通股價有望繼續領跑！

講開電訊範疇，好耐冇睇過隻龍頭電訊設備股——中興通訊（00763）。最近管理層表示，今年收入目標增長保持喺兩成以上，並會爭取拉近與主要競爭對手嘅差距。

最近花旗亦就中興發表報告，指對中興長期增長前景具信心，皆因公司受惠智能手機潮以及雲端技術嘅發展，並預期其一一及一二年度盈利增長均可超過25%，故維持建議買入，目標價睇34元。

盈利保持高增長

中興自○八年度起每年都有派息兼送紅股，且盈利保持雙位數字增長，長期捧場嘅小股東真係「嗒糖」﹗如無意外，本年度公司可再創佳績，過去兩年，每逢六、七月都係低吸中興嘅好機會，話唔定今年亦唔例外。以上周低位25.8元計算，已較首季高位回落約16%，有銀士可以部署分注作中線吸納。

戰報

TCL通訊（02618）

阿莊尋日推介嘅TCL通訊果然落鑊，炒上最高6.43元，吼中於早市低位5.62元上車，即日賺逾14%。

碧桂園（02007）

錢進於十九日吼中隻碧桂園，當日低位只係3.14元，尋日炒高至3.55元，走番轉最多可賺超過13%。