港交所分兩Part歡送韋奕禮

證監會行政總裁韋奕禮下周三就離任證監會，呢兩個星期差不多日日都有佢嘅歡送會，真係好鬼忙碌。好似被證監會監管嘅港交所（00388）就分「上、下集」歡送韋奕禮。

先說「下集」。話說尋日港交所主席夏佳理及一眾董事，就喺港交所交易大堂搞咗個酒會歡送佢，但呢個係私人聚會，太子無緣參與，不過，聽聞場面熱鬧，有近100人出席，且有不少經紀畀面，就連財經事務及庫務局常秘區璟智都有嚟出席畀面派對。

夏佳理致送高球棒

韋奕禮好鍾意打Golf，夏佳理就代表港交所送兩支高爾夫球棒畀佢留作紀念。但韋奕禮返到英國後，好快就要投入新工作，未知佢仲有無時間打Golf呢？

港交所都算有心思，知道韋奕禮好鍾意打Golf，除咗昨日嘅酒會之外，原來早一兩個星期前，已有「上集」，港交所董事局喺粉嶺高爾夫球會設晚宴歡送韋奕禮，當晚人少少，只有一圍枱，夏佳理同行政總裁李小加當然係座上客。

咁點解要去到粉嶺高爾夫球會咁遠？原來係貪嗰度遠離市區，又較有風味，不像平日喺酒樓餐廳咁普通。