Fundman睇市:華潤電力值博率高

美股前晚本來上落唔算大,不過人人諗住個市試一試250日線後至買貨,抱住遲買好過早買嘅心態,催化港股昨日來個先低後高的單日轉向,收市指數升16點唔算叻,可是如果由即市低位22,519點起步計,到收市22,747點,反彈228點,整番支大陽燭,奈何成交始終唔多。

筆者認識的基金經理及炒家,大部分都唔敢入市,原因多數同歐債危機或者QE2落幕無關,反而係個個驚內地一放就亂一收就死,人行閂水喉閂過龍,最終搞到A股free fall。

前日任總出席講座,計好數做埋Power Point(可以上任總個博客下載),都係想講畀大家聽一個事實,就係內地物價春節後已經停止再升,轉趨平穩,但基於CPI去年基數較低關係,下個月十四號公布嘅五月CPI,仍然會由5.3%升到5.8%,六、七月更加會去到6.4及6%,而且仲係假設今、明兩個月通脹完全唔升的情況下至會出現,你話唔驚就假!

拆息高企A股遭殃

過去幾日香港唔少基金股被隊到爆廠,滬綜指隊得一樣咁勁,三日跌咗4.1%或者117點,消息話係因為唔少A股基金需要應付客仔大額贖回所致。

睇番上海人民幣拆息,隔夜息短短幾日由2.1厘抽升1.38倍去到5厘,一個月息口亦由三星期前的3.6厘升到5.33厘,如果五月通脹真係好似任總所講,只係平穩發展的話,段估人行唔會畀拆息抽到咁離譜,係咪有啲嘢人行知、我哋同任總唔知?惟有等CPI曝光後搵答案。拆息一日唔落,A股恐怕好難有運行。

近期內地面對○四年以來最嚴重的電力短缺,本來中央如意算盤係唔畀上游動力煤供應商加價,同時電力企業亦要凍結電費,從而壓低通脹,但上有政策下有對策,瑞銀早前出咗份電力行業報告已提到,本來全國總機組發電能力較○八年多近一成,但煤商陽奉陰違,唔按合約供應量供應電煤,轉為喺現貨市場賣賺到盡,電企惟有借修廠為名關機,抱住少做少蝕嘅態度,令機組設備使用率持續下跌。

進入夏季用電高峰期,電荒問題迫在眉睫,目前全國有湖南、湖北、江西、浙江、江蘇、安徽、山西、陝西、河南、廣東、四川等十個省出現缺電危機,早前內地報道,發改委篤定讓湖南、安徽等五個省份提高電價,但市場消息指,實際加電價的地區將會更多。

電價上調勢在必行

華潤電力(00836)在預期加價的省份,包括湖南、安徽、河南等經營9間電廠,市場估計即時的受惠最大。綜合大行估計,潤電一一年賺57.55億元,較去年回升17.3%,預期市盈率12.5倍,較歷史平均18.8倍折讓33.5%,保守點,以預測下限50億元計,PE亦只係14.6倍,較歷史平均折讓22%。

筆者相信潤電股價已過分反映電企困難,事實上○九年情況同樣惡劣,但經營效益最佳的潤電,盈利僅跌7.7%,較市場預期為佳。春江鴨似乎已押注加電價短期落實,橫行近三星期的潤電股價昨見異動,目前估值相當吸引,假如折讓收窄至10%,股價應在18元樓上,基於壞消息完全消化,現價值博率都幾高。

跨媒體地產網新居入伙 幾萬個精選樓盤 歡迎睇樓!

「Money18免費即秒股票網站」現推出8升級功能,財經資訊,實時實發!

史提芬