股海實戰：中國南車可睇位加注

眼見前日有缸邊勇士入場博反彈揸期指，但尋日上晝見到恒指再跌多兩舊，下晝開市早段亦未見起色，惟有無奈選擇投降。誰知接近下晝三點，開始有買盤進場掃貨，內銀股及中移（00941）走勢較堅挺，結果恒指止跌回升，報收22,747點，升16點，大市成交610億元，呈單日轉向。顯然，喺牛熊分界線（250日線22,468點）前，好淡爭持轉趨激烈。

新股嘉能可（00805）尋日首天掛牌，全日低位64.55元，收報64.9元，較招股價低2.4%，全日成交8.33億元，表現喺預期之內。新股王米蘭站（01150）T+2後未見再炒高，部分炒家沽貨離場，結果尋日以全日低位2.51元收市，跌7.72%，成交9,111萬元。畢竟呢隻股估值唔低，再炒上去主要靠貨源歸邊推動，相信要收一浸貨先至再行，寧願見有動靜先入場追，免得又要捱價。

缸邊友對「中投三寶」由愛變恨，皆因近期跌勢頗急，一個心軟沽唔切，成手蟹貨真係唔知點搞好！尋日保利協鑫（03800）再跌7.18%，成交達到15.8億元；旭光（00067）跌10.34%，成交4.97億元；中芯（00981）跌7.25%，成交1.93億元。保利協鑫及旭光股價一浪比一浪低，樓上浸浸蟹貨，需要一段較長時間消化，即使短期股價回穩且沽壓消減，亦別對反彈存太大期望。

中移已屆收集水平

目前阿莊組合有四成係揸現金，次季跌市好大機會係下半年組合建倉嘅好機會，所以近期正密切留意有咩好嘢買。論估值，中移呢鋪跌得差唔多，最多冒住再跌一成嘅風險入市，並採分注收集策略以降低風險。此外，尋日獲高盛唱好、納入其「確信買入」名單嘅昆侖能源（00135），股價以大成交升4.5%，收報13.26元，照計13元邊都有得諗。

另一隻阿莊愛股中國南車（01766），近日宣布落實透過子公司投資14億元人民幣建設大功率IGBE產業化基地，正式啟動內地首條八英寸IGBT芯片生產線項目，IGBT為逆變器最核心、價格最高的零部件之一，廣泛應用於太陽能電池、風力發電、新能源汽車等生產，可見呢項投資策略意義重大。

其實早前阿莊亦曾提及，南車除咗受惠高速動車組及城軌相關產品需求持續增長外，亦積極拓展其他業務範疇，如節能及新能源汽車，旗下電動汽車已量產。喺涉及新能源方面嘅業務發展，長遠可建立新嘅增長點。

盈利步入高增長期

今年首季，南車淨利潤增長1.65倍，足見盈利進入高增長期，但近季股價卻受到鐵道部高層地震以及國家鐵道投資規劃略作調整嘅拖累而下跌，尋日收報7.56元，升1.2%。阿莊相信，現價已頗大程度反映負面因素，估值吸引，且RSI已明顯出現背馳，故計劃短期入場加注，中線目標坐8（元）望9（元）。

戰報

漢登（00448）

漢登昨搶高至2.4元，Sammi早於本月五日已作推介，跟佢於當日低位2.05元上車，最多賺逾17%。

長興（00238）

冼金基上周三推介嘅長興繼續有追捧，尋日高位做4.53元，以當日低位3.99元計，跟到足可賺逾13%。