太子手記:證監搵CEO 英澳幫火併
證監會行政總裁韋奕禮仲有兩個星期就離任 ,政府為呢個職位進行全球招聘,引來多名「老外」吼住,聽聞「英國幫」及「澳洲幫」對職位好感興趣。
太子聽聞,英國金融服務監管局(FSA)早前因為組織功能及架構改變,好多人離職,市傳FSA有好多人對證監會CEO呢個位有興趣。咁又係,韋奕禮來港六年,今次返老家「衣錦榮歸」,都咪話唔羨煞旁人。
狄勤思傳無興趣
澳洲幫方面,市傳不少澳洲證監會高層,包括前主席,甚至現任高層等,都有被邀請,或者申請進行面試。
此外,港交所(00388)上市科主管狄勤思,市場亦有傳佢被獵頭公司邀請過。太子聽聞,佢應該對職位冇乜興趣。
多名「老外」吼住韋奕禮行政總裁個位。(資料圖片)