股海實戰：龍源電力風電股首選

美股前晚高收，帶動港股昨日高開，惟呢期港股同A股一樣，都係「五行欠水」，恒指上升動力不足，結果收報23,291點，跌44點，大市總成交758億元。

大笨象（00005）季度業績表現遜色，而尋日策略會內容亦喺市場預期之內，股價如期回落，收報82.85元，跌1.37%。

今日政府賣地，估計三幅住宅地皮可為庫房進帳逾50億元，此前地主股長實（00001）、新地（00016）及恒地（00012）股價靠穩。

由於○八年至今，政府僅推過兩幅港島豪宅地拍賣，相信今日拍賣嘅司徒拔道地皮會成為大地主焦點。麵粉咁貴，麵包冇減價空間，呢個道理好易理解，地主股資產有價，毋須過分睇淡。

內地四月份CPI按年上升5.3%，食品價格上升11.5%，PPI升6.8%。CPI升勢似乎經已受到控制，但要見頂回落，估計最快七月才出現。事實上，正如投行摩通所言，過去人行四次加息，滯後反應將會喺未來數月才顯現，近期兩地股市出奇地弱，也許正在反映呢份預期。

近呢個星期阿莊一再講重磅股冇得炒，轉炒二、三線股，佛誕假後復市，「炒股不炒市」嘅趨勢逐漸明顯。中電新能源（00735）與第一太陽能達成戰略合作嘅消息，刺激股價升逾一成；阿莊假前增持嘅中芯（00981）繼續慢火煎魚，高位做0.92元，收報0.91元，升5.81%。

米蘭站細細粒容易炒

米蘭站（01150）正在進行招股，加上PRADA即將來港上市，而經已喺美國掛牌嘅COACH又話擬以預託證券形式喺香港作第二上市，「名牌包包股」數目增加，又多咗一個新板塊可供炒作，米蘭站作為先頭部隊，加上晒士細，相信炒家唔會放過炒作機會。

尋日見到部分零售股亦受惠利好氣氛，逆市走高，兩隻手錶股──東方表行（00398）及先施錶行（00444）均高收，同樣銷售奢侈品嘅耀萊（00970）尋日早段見過1.46元，之後回落至1.35元，最後反彈上1.42元平收，可以目及實動向。

部分中資股亦有睇頭，中化肥（00297）及洛陽玻璃（01108）同升逾一成。龍源電力（00916）剛公布首季純利增長61%，至6.34億元（人民幣．下同）。值得留意嘅係，喺35.36億元收入之中，風電收入佔15.86億元，增幅達43%，以呢個增長速度，相信年內風電比重可追過火電業務，成為公司最大嘅收入來源。

佳績支持股價突破

首季業績勝預期，有助鞏固其作為首選風電股嘅地位，目前市場給予嘅估值略為偏低，若以一一年預測市盈率二十倍計算，合理價可達9.5元（港元．下同）。

過去一年其股價一直喺6.6至8.7元水平上落，業績對辦為股價突破提供動力，支持位喺7.5至7.6元。

戰報

中國信貸（08207）

志強上月二十七日推介隻中國信貸，尋日突然搶高至1.71元，較推介日低位1.35元，累升逾26%。

寶勝國際（03813）

史提芬上周二吼中嘅寶勝，尋日高位做1.36元，跟佢喺推介日低位1.2元買入，最多賺逾13%。