太子手記：股神慈善午餐擇日競投
一年一度嘅股神巴菲特慈善午餐拍賣又到，拍賣一如以往喺eBay進行，由紐約時間六月五日晚上十點半開始，到六月十日晚上十點半結束。能唔能夠打破舊年嘅紀錄就仲未知，但想同股神共進午餐嘅「粉絲」，就肯定要準備好「彈藥」喇。
呢項慈善活動已經舉行至第十二屆，收益撥捐專為窮人提供職業訓練及醫療服務嘅美國慈善機構格萊德基金會。
中標者可帶同七名同伴與巴菲特共進午餐，地點係曼哈頓扒房Smith & Wollensky。
去年262萬美元成交
慈善午餐拍賣底價2.5萬美元，舊年由「神秘人」以破紀錄262.6萬美元投得，同二○○○年首屆的2.5萬美元相比飆升逾百倍。
除咗留意拍賣結果外，太子仲會留意今個月十九號出街嘅NBC喜劇《The Office》，皆因巴菲特將跳入公仔箱客串吓。
股神巴菲特慈善午餐下月在網上拍賣。（資料圖片）