股海實戰：中國海澱可逢低收集

近期金、股、匯三市齊挫，有理由相信，大幅波動嘅背後正掩飾大戶調倉部署，季內能否捕捉大戶倉位變化，將成為今年投資成績嘅關鍵！

過去八個交易日港股出現大單邊跌市，好似好兇殘，但實際上交投未見顯著增加，且大體上恒指仍處於22,300至24,500點波幅區內。大戶刻意經營淡市，說不定係為低吸港股做部署。事實上，次季商品價格調整，有助紓緩加息壓力，有利經濟持續復甦，可為下半年升市打下良好基礎。再睇番恒指走勢，阿莊亦有感今年五、六月可能係舊年同期嘅翻版，即係話可能即將見到今年恒指低位，接下來就係新升浪嘅開始。

講番本周市況，周二本港佛誕假期，但周內卻有多個重要消息公布，包括內地四月份經濟數據、中美經濟戰略及對話會議、大笨象（00005）季績及投資者策略會，以及本周四政府賣地等等，市況可能較為波動，各位要緊握扶手。

講到內地四月份CPI，市場普遍預期增幅會維持喺5%水平，面對通脹壓力增加，季內人行再度加息係意料中事，但近期A股弱勢不一定純粹因為加息預期。

內地股民有排捱

今年以來A股表現只係原地踏步，跟唔上企業盈利增長以及人民幣升值趨勢，歸因係自中央拋出4萬億元人民幣刺激經濟方案後，市場流動性過剩，透支咗A股升勢。正所謂「有咁耐風流，有咁耐折墮」，A股估值偏高嘅問題唔係一時三刻就可以解決，內地股民要繼續捱吓苦日子！

內地股、樓都冇得炒，游資苦無出路，據聞部分又再重投港樓懷抱。近日九龍區一新盤開售，呎價過萬，都係多得同胞捧場。無他，短期本地樓市供應難以大增可以話係「死症」，除非政府宣布復建居屋，又或者息口變化觸發資金從樓市流出，否則樓價和租金都易升難跌。近月收租股已明顯跑贏大市，地主股跌到咁上下，又可以留意收集機會。

講到北水南來，最近本港有遊艇展，聽講有同胞豪擲以億元計掃豪華遊艇，可見內地暴發戶數目不斷增加，對高品味娛樂及消閒產品需求大幅提升，類似遊艇呢類奢侈品，跟名牌「包包」（手袋）一樣，唔需要擔憂冇銷路。

喺香港上市公司當中，中國海澱（00256）亦睇準呢個商機，去年二月與英國主要豪華遊艇建造商之一嘅Princess Yachts訂立分銷協議，成為後者在港嘅獨家分銷商，相信今年開始有關業務將全面反映投資效益。

受惠奢侈品需求

此外，中國海澱經營品牌鐘錶及時計產品，以及物業投資業務，去年持續經營業務稅後溢利翻一番至2.73億元，表現理想。以一家身處高增長市場嘅消費股，往績市盈率十三倍，估值具有上調空間。該股上周五收報1.02元，趁靜局可以逢低收集，中線望兩至三成利潤，0.9元止蝕。

戰報

中民控股（00681）

積奇上月二十九日睇中隻中民控股，上周五高位做0.248元，較推介日低位0.218元，累升近14%。

海隆控股（01623）

錢進上周五推介嘅海隆控股即日落鑊，高見2.69元，若於低位2.46元上車，即日走番轉都有逾9%進帳。