股海實戰：國藥有力挑戰30元

港股尋日唔見有似樣嘅反彈，兼且成交再度縮減，阿莊寧願佢一次過下試23,000點再反彈，都好過依家陰乾咁跌。唯一可慶幸嘅係，即月期指低水幅度收窄，正所謂「吊頸都要抖抖氣」，短線大市反彈，尚持重貨者宜好好把握減倉機會。

淡市傳來供股消息，中信資源（01205）宣布10供3，供股價每股1.38元，集資25億元，中信及淡馬錫已承諾認購。小股東聽見公司要抽水，當然唔多高興，但對於長線持有嘅股東，能夠以折讓逾兩成嘅作價參與公司集資，亦未嘗唔係無得諗！

大型新股陸續登場

講開又講，近月金魚缸確實有唔少集資活動，嚟緊仲有幾隻大型新股。遠大中國（02789）因應淡市調低招股價後，改喺本月十七日掛牌。全球最大商品交易商嘉能可（00805）正式展開全球招股計劃，料共籌集逾100億美元，其中本港IPO部分將於下周五展開，本月廿四及廿五日分別喺倫敦及香港掛牌，聽聞經已搵咗唔少大孖沙入飛，有助確保招股計劃得以落實。

另外，內地滌綸生產商百宏（02299）及上海醫藥（02607）亦正進行招股。傳統智慧睇，咁多大型IPO活動，照計市況唔會太差。究竟五月份市況真係由頭「窮」到落尾，抑或係先低後高，就要做事後孔明！

上述多隻新股之中，本地股民較有興趣嘅可能係上海醫藥，事關普羅大眾較容易接觸到醫藥行業，加上內地推動醫療改革，經已講咗好幾年，呢個概念股民唔會陌生，再講上藥入場費每手3,000蚊有找，相信反應唔錯，只係過去A股來港發H股嘅，由於A股股價變相係一個上限，即使定價留咗水位，炒極都有個譜，呢一點看官要注意。

講到炒作新股，阿莊認為米蘭站（01150）先至係焦點，一來集資額同招股價價位都相對細，二來賣二手名牌袋賣到咁巴閉，看家本領不離一個「炒」字，表現值得期待！

首季純利穩步增長

唔知係唔係炒影子概念，上藥今日開始招股，尋日醫藥股已率先有異動，聯邦制藥（03933）升6.8%、中國生物製藥（01177）升2.8%。其實論業務性質，與上藥較相似嘅係國藥（01099），尋日股價曾高見28元，收報27.85元，升3.15%。

國藥剛宣布，按中國會計準則計算，今年首季純利4.02億元人民幣，同比增長27.6%，表現唔錯。

配股有助業務擴張

上月下旬，公司宣布擬配售最多1.38億股H股，配售價每股25元，集資34.5億元，將用作擴大醫藥分銷及零售網絡，並補充流動資金。宣布配股以來，其股價維持喺26至27元水平上落，但成交明顯增加，尋日股價剛升至50日線，若然短線能以大成交突破28元關，相信可以反覆向30元關推進，跌穿26.5元止蝕。

戰報

百營環球資源

（00761）

錢進上周二吼中隻百營環球資源時，低位只係0.111元，尋日搶高至0.137元，累計賺超過23%。

美亞娛樂

（00391）

冼金基上周三推介嘅美亞娛樂，尋日高見0.212元，以推介當日低位0.192元計，最多可賺逾一成。