太子手記：證監會仲搵緊新竇

證監會辦公室一向坐鎮中環，近日有消息話證監會喺遮打大廈租約於二○一三年到期，有機會搬去即將完成重建嘅銅鑼灣希慎廣場（即係以前嘅興利中心），消息一出，唔好話證監會內部，連市場都議論紛紛。

太子聽聞，行政總裁韋奕禮前日下午即時出咗個電郵畀員工，話辦公室有機會搬去希慎廣場嘅消息「純屬揣測」，選址仲未落實。

遮打大廈租約快滿

證監會係本港證券及期貨嘅監管機構，其他金融監管機構，好似金管局、港交所（00388），以至政府總部等都喺中環心臟地帶，所以若證監會搬離大本營中環，的確係創舉。證監會依家有兩個辦公室，一個喺遮打大廈，一個喺李寶椿大廈，喺運作以至溝通上的確存在不便，確實有需要搵一個大啲面積嘅辦公室，容納晒所有員工。

但要喺中環搵一個大面積嘅辦公室都幾有難度，一來租金貴，二來好多大型商廈已租出。證監會喺遮打大廈嘅租約於○三年簽訂，當時經濟唔好，一簽十年，依家要續租，租金叫價肯定好乸脷。