Fundman睇市：中材強勢股長炒長有

美國政府宣布已將阿蓋德領袖拉登擊斃，一度提振美元和美股。前日亞洲時段道指期貨亦曾急升，惟到當晚美股未有出現大幅波動，結果道指以微跌3點收場，亞洲股市昨日亦未見異樣，可見投資人頭腦相當冷靜！

港股結束「五一」長假，大戶小戶都各自歸位，上晝交投尚可，恒指試過23,924點後回落至23,700點水平窄幅上落，可惜下晝又係悶局一場，長假期間人行未有加息，A股復市反彈，亦無助刺激港股表現，恒指倒跌收市，報23,633點，跌87點，成交唔到700億元，好友信心跌到落谷底！「Sell in May」可能就在眼前，看官要做好心理準備，一旦大方向出現，走勢頗大機會轉急，記得緊握扶手！

內地續採緊縮政策

內地四月份製造業PMI微降，表現符合市場預期，料季內餘下時間，中央會繼續採取緊縮政策，嚴防通脹係首要目標，哪怕經濟增長略為放慢一點，次季以來的A股表現，亦正在反映呢份預期。

近月經常聽到有關內地黑心食品的報道，食品安全已經發展到國家大事的層面。講到食品，早前A股雙匯受「瘦肉精」事件打擊，上月中旬公司復牌，股價急瀉，市值蒸發逾百億元人民幣，唔少基金貪其哂士夠大，在行業又手執牛耳，所以揸重貨，誰知呢鋪真係輸到眼定定！

筆者最近跟一位中資食品股管理層會面，談及「瘦肉精」事件，才知道原來唔少食品商都替雙匯不值，事緣今次事件純綷係因為喺採購豬肉原材料上出問題，問題關鍵出在小養豬場或散養戶出售豬隻，必須先取得衞生驗證，採購商亦是假設在呢個機制把關下進行採購，誰知把關出事，嚴格來講雙匯是受害者，但如今卻變成眾矢之的。

不說不知，原來瘦肉精是由西方國家發明，目前亦有使用於飼養牲畜，但都有明確的使用標準，且執法嚴厲。內地先後發生毒奶、瘦肉精等食品安全事故，足以揭示食品供應鏈嘅品質監控極待改善。大型企業之間競爭激烈，品牌無價，斷無道理為了短線微利而違法，但唔好彩踩中地雷，後果可以好嚴重！從投資股票的角度睇，呢個問題一日未獲解決，只會令整體食品股付上不必要的風險溢價。

受惠需求毛利高企

再看企業業績消息，中材（01893）剛宣布首季度業績，純利2.01億元（人民幣．下同），同比大增1.5倍。上月水泥股普遍上揚，中材股價由上月初7元邊，急升至中旬高見8.47元，短時間內累升三成多，見到有基金股東趁高減持。不過，翻查資料，唔難發現其實部分基金股東喺中材股價6、7元時已開始減持，但無阻股價升勢。

從水泥行業季度數據顯示，毛利普遍優於預期，3,600萬套保障房陸續動工，相信業界毛利率高企嘅日子尚可維持一年有多，水泥股多炒一、兩季唔出奇，所以見到近期中材股價回到咁上下，又有強者入場掃貨，總之，睇住7.5元呢個重要支持位順勢揸，升勢未變，亦無謂估頂。