股海實戰： 金山軟件博財息兼收

拉登被殺，美國人雖然高興，但頭腦仲算清醒，前晚美股表現理性，未有因此而出現亢奮式爆升。至於港股，尋日長假歸來，市況尚未見有改善，恒指喺24,000點關前受阻，之後大部分時間喺23,700點水平徘徊，尾市轉升為跌，收報23,633點，跌87點，主板成交僅695億元，依然係一潭死水！睇勢短線恒指有機會下試50日線23,451點支持，買重磅股唔使心急入市。

查實拉登之死，與美國以至全球經濟復甦冇咩大關係，消息影響係心理多於實際。反之，喺通脹重臨嘅大環境之下，商品價格依然易升難跌，美元弱勢亦難改，宏觀經濟基本因素未有因此而產生重大變化，呢一點投資者必須要搞清楚！

A股有波幅冇升幅

內地股市尋日亦復市，冷不防為五月市況來個「開門紅」，走勢先跌後回升，滬綜指收報2,932點，升20點。內地四月份製造業PMI溫和下跌，投行大摩表示，數據符合預期，並估計緊縮政策將會持續。事實上，如今市場已普遍預期，六月底前人行會繼續上調存款準備金率，並尚會加息一次。五行欠「水」，A股難升，但喺憧憬人民幣升值及通脹升溫嘅大前提之下，預期資產價格大跌係不切實際，故阿莊相信，季內A股會維持有波幅冇升幅嘅局面。

港股方面，尋日阿莊提及本月十九日業績公布前股價可繼續走高嘅中芯國際（00981），果然有料到，高位曾見0.79元，收報0.77元，升幅10%，成交股數超過10億股，乃前年十一月以來最大單日紀錄。由於走勢呈突破，阿莊亦忍唔住手，喺0.72元追入60萬股等運到！

除咗中芯之外，其他半導體股亦受帶動逆市上揚，華潤微電子（00597）及先進半導體（03355）分別升6.49%及13.12%。

至於軟件股亦有睇頭，專門做智慧安防預警系統嘅中國安芯（01149）股價重上2元樓上，收報2.1元，升7.14%；神州數碼（00861）逆市升1.06%；而從事網絡遊戲及應用軟件開發嘅金山軟件（03888）同樣高收作結，報5.23元，升幅3.36%。

成交配合展新升浪

講起金山，去年受盈利增長放緩影響，次季股價急挫，下半年一直喺低位徘徊。直到今年首季，股價重上橫行區頂部，上月成功突破阻力位，近周進行整固，但見沽壓不大，尋日又再異軍突起，一度衝高至5.34元，成交明顯增加，期間不難發現大戶手影，相信呢支大陽燭可確認新升浪開始，目標見5.9元，止蝕位4.85元。

順帶一提的是，金山去年業績盈利雖輕微倒退3%至3.7億元人民幣，但公司慷慨派息，除咗派發末期息每股0.15元，另外派特別息每股0.25元，即每股穩收股息0.4元，二者均於本月十七日除淨，料此前續可吸引炒家上車，大家不妨一起湊熱鬧，博來個財息兼收！

戰報

唐宮中國（01181）

史提芬上周五推介咗隻唐宮，當日低位2.53元，尋日搶高至3.05元，短線食胡又賺超過兩成。

中芯國際（00981）

Sammi尋日推介嘅中芯即日落鑊炒上，一度飆至高位0.79元，吼中於開市低位0.69元上車，賺逾14%。