股海實戰：勝獅貨櫃利好因素多

內地呢頭公布完CPI，嗰頭人行就快手調高存款準備金率，不過行動喺意料之內，故見內地A股尋日未有大散，滬綜指升6點收市，報3,057點。反觀港股真係唔爭氣，雖然上晝低開後一度倒升，但下晝嘔凸，埋單唔見177點或0.7%，報23,830點，主板成交僅711億元。

除了進一步調高存款準備金率外，投行預期次季再度加息機會增加，內銀股普遍低收，農行（01288）回落至4.55元收市，跌幅2.15%。不過，阿莊相信，短線震盪無礙季績部署。標普調低美國信貸評級至負面，道指挫逾200點，港股今日難免一跌。

異動股方面，阿莊持有嘅中航科工（02357）尋日成跌市奇葩，高位4.64元，收報4.6元，升5.5%，成交達到3.59億元，大成交突破三月份高位，今轉有運行，可以睇位加注。

鋼鐵股受壓，皆因上周鞍鋼（00347）就首季發盈警，預期季度業績同比大降逾九成，主要係成本增加，並預計五月份將調低產品價格，以退回差價補償客戶。市場預期，鞍鋼次季經營表現可能會較首季更差，即係話上半年業績都幾濕滯，尋日股價曾低見10.26元，收報10.54元，跌1.13%，短線10元關承接仍備受考驗，暫未到撈底時候。

此外，中遠太平洋（01199）宣布，首季度總吞吐量達到1,146萬標準箱，按年增加19.5%，三月份同比增幅則為23%，達405萬標準箱。受季度經營表現理想的消息帶動，股價逆市走高，收報16.42元，升3%，成交1.69億元。

確認步出行業低潮

港口及航運行業前景持續改善，對周邊行業帶來正面影響。從事製造集裝箱嘅勝獅貨櫃（00716），近月雖有基金股東減持，但股價靠穩，尋日高位曾見3.68元，最後收報3.59元，升1.13%。

上周，勝獅宣布成功發行一四年到期13.8億元人民幣票據，年息4.75%，料可集資13.59億元人民幣，將作為內地嘅營運資金及一般用途。

舊年，勝獅已扭轉虧損局面，實現純利9,254萬美元，確認步出行業低潮。隨着港口及航運業有更多數據顯示復甦持續，市場對集裝箱嘅需求回升，預期增長將維持至明年。

為應付市場需求，公司正積極擴大產能，尤其係喺上海及鄰近地區，舊年底便購入啟東一塊地皮以興建新嘅集裝箱廠房，預計明年上半年開始投產。是次成功發行人民幣票據，有助應付資本性開支。

另一方面，展望今年主要原材料——鋼價今年穩中有升，加上市場需求殷切，有能力轉嫁成本升幅予客戶，以維持穩定嘅毛利率。整體而言，今年公司可受惠產品價、量齊升，盈利前景樂觀。現價計往績市盈率十二倍，息率2.2厘。建議喺3.5元樓下分注收集，目標向4至4.2元推進，止蝕位3元。

戰報

英皇國際（00163）

志強上周一睇中嘅英皇國際尋日一度高見1.87元，以推介日低位1.62元計，跟到足，賺超過15%。

東岳（00189）

Sammi同日推介嘅東岳繼續呈強，尋日再創新高8.38元，於當日低位7.13元上車，最多賺逾17%。