股海實戰：農行收夠貨等開車

道指隔晚低收，但尋日日股回升，加上滬綜指企穩3,000點樓上，恒指順勢收復24,000點，收報24,135點，升158點，但成交降至700多億元，反映大市沽壓雖然不大，但喺周五內地公布經濟數據前，投資者入市意欲亦有限。

特區政府表示會喺四至六月安排出售十二幅地，當中九幅屬住宅用地，估計涉及單位數目2,650個。增加市場供應係應對高樓價嘅對策，但由開始賣地到樓宇落成推售存在一段時間差距，遠水難救近火，而通脹預期亦抵銷了政府增加土地供應嘅心理影響。講到尾，除非低息環境逆轉，又或者內地資金大量撤出本港樓市，否則暫不見得樓價會有大跌之虞。

稻香具影子股概念

已截飛嘅內地餐飲股唐宮中國（01181），聽聞認購反應唔錯，估計與集資規模唔大，加上投資者睇好內地餐飲業發展有關。之不過，與其認購新股，阿莊認為港人熟悉嘅稻香控股（00573）有多年經營往績可供參考，現價往績市盈率十三倍，息率4.4厘，未來數年會加大力度拓展內地市場，係幾好嘅現成選擇，只可惜隻股成交唔算多，買貨要耐心收集。

恒地可穩坐順風車

前日吼位買入嘅鐵貨（01029），尋日2元有阻力，遂以1.98元沽出，短炒一轉獲利約3.4萬元。講開組合持股，阿莊喺上月中旬買入嘅恒地（00012），不斷獲得大股東喺市場增持，前日公司更披露，大股東斥資100億元行使公司發行嘅紅利認股證（00879），驗證當初阿莊話，隻股有機會踢上紅輪行使價58元，以吸引股東行使嘅猜測估啱咗方向。尋日恒地最高曾見56.95元，收報56.25元，升2.7%，紅輪收報1元，升幅31%。

政府剛宣布增加賣地，相信類似恒地呢類大地主有興趣增購土儲，照計嚟緊股價踢上紅輪行使價樓上，能夠達成集資額逾200億元目的嘅可能性不低。

之不過，阿莊估計，正股必須要企喺60元邊一段時間，才能真正說服其他股東行使紅輪，即係話現價仲可以睇高一線。既已安坐順風車，會繼續坐定定睇好戲。

尋日內銀股僅交行（03328）低收，雖然派送紅股，但始終減派股息，令吸引力稍遜。同類股中，阿莊認為農行（01288）走勢值得留意，皆因近期股價喺4.5元有明顯爭持，見大量散戶沽貨獲利，但大戶多多都食得落。

事實上，喺內銀股之中，農行舊年嘅業績表現最受大行讚賞，而即使人行繼續加息，鑑於該行活期存款所佔比重較多，且資產周期較短，料所受負面影響較同業輕微。

近兩個交易日，農行連番成功守住4.38元，尋日再次重上4.5元樓上收市。睇勢如今只待大戶收夠籌便會開快車，4.4元水平下注，目標上試4.8至5元區域，止蝕位4.25元。

戰報

積奇本月四日推介嘅東岳近日創新高，以昨日高位7.54元計，較推介日低位6.41元已升逾17%。

恒大地產尋日高見5.02元，較錢進上月三十日推介時低位4.04元，足足升超過24%，果然眼光夠準！