Fundman睇市：滬杭甬勝在派息慷慨

資源股跌，內銀股開始回吐，拖累港股昨日再度失守24,000點關口，收市報23,976點，跌326點。狂人卡達菲欲停火，革命軍不願，商品市場有理無理，先利用消息獲利，前晚紐約期油同期金，分別由高位113.4美元及1,478.1美元回落，拖累中石油（00857）及中海油（00883）雙雙下挫，昨收11.74元及19.86元，跌0.6元及0.59元，兩隻股票令恒指唔見88點。

恒指今浪由日本核危機後低位22,123點起步，升到24,468點，昨日一跌，剛好回到0.236支持，即23,915點，到底跌夠未？關鍵在周五內地公布的三月CPI身上，目前恒指相對處於高位，24,500點關不破，業績期又炒完，基金經理焦點回到宏觀經濟環境，周五數據明朗化前，睇怕今明兩日大市見23,500點機會唔細。

歐洲加息，相信好多人會問幾時輪到美國？事實上，過去三年，最多人估錯嘅都算係美國退市時間表，○九年初，唔少人估年底聯儲局退市，結果去到舊年成街眼鏡碎，投行策略師就當無估過算數，收晒聲。近半年，美國財金官員愈來愈傾向把美元利率跟就業市場表現掛鈎，二月份失業率8.8%遠勝預期，但比起○七及○八年真係好景時平均的4.6%及5.8%，仲係高一大截，睇怕失業率唔見7.5%甚至7%以下，美息想郁都幾難。

買樓收租唔吸引

經過漫長零息期，大家唔多唔少體會到問題所在，零息變相是懲罰節儉儲蓄，助長借貸度日；有資產者日子好過，無資產者生活難捱！最近筆者去了一個投行搞的睇樓團，看到不少租金回報率1至1.5厘的豪宅，以及租金回報率得2至2.5厘的商舖，心想今時今日借錢唔使成本，賭資產價格升值的仲係市場大多數，物業短期可能仲會再升（九七年按揭十多厘，豪宅租值試過低於1厘），但要買來收租投資，真係打句問句筆者都唔會。

要找定息投資，街外選擇唔少，好似唔少本地銀行的永續債券，都有6.5至8厘，問題係一旦資產價格繼續升，又或者長債息突然飆升，短期可能賺息蝕價，而且套現亦唔容易。

近日筆者積極搵吓既能享受通脹，又可收高息的投資，領匯（00823）無疑屬首選，始終政府要打壓住宅而非商舖物業，領匯租金亦有力跟隨通脹，只怕市民怨氣升溫，影響長遠租務表現。留意到內地公路股昨日表現唔錯，一來市況轉差，但相信更大原因，是唔少人同筆者一樣想法，趁機搵高yield股等運到有關。

7元樓下可考慮

今年發改委全力要求國企及民企凍價，不過，單以路費收入來自人民幣，對以港元投資的H股股東，已可享3至5%自然增長。眾多選擇中，滬杭甬（00576）是心水股之一，即使今年車流量估計最叻都係增加1至3%，不過A股交投回升，對其副業─證券業務肯定有幫助。

滬杭甬另一吸引之處就是慷慨的派息，過去五年複合式股息增長有12%，今年預期股息率有5.7厘，即使未來預期五年降到6至7%，都算唔錯。

收租又嫌煩，買債券又怕發行商執笠，7元樓下不如諗吓滬杭甬。