Fundman睇市：碧桂園趁調整買入

周一恒指終於突破24,000點，內銀股主導升市。三月初至今恒指累升3.2%，但國企金融股指數升咗7.2%，是前者一倍有多，原因係幾隻內銀股業績好過分析員預期，吸引基金捧場。

昨日傍晚，人行宣布加息0.25厘，今次唔揀周六周日，反而在清明節出手，一班中國經濟策略師有排忙了。早兩日，筆者和幾位銀行分析員朋友茶敍，做咗非正式統計，席上五個朋友們不約而同都估十五日內地公布三月CPI前的周末，最大機會加息，如果愈出其不意分數愈高，今次人行實攞滿分，但基於市場已預期三月CPI會升到5.2至5.5%，破去年十一月5.1%高位，上半年一至兩次0.25厘的加息幅度是市場預期之內，相信對股市影響唔會太大，超買的港股或者有機會藉消息回試23,800至24,000點之間搵支持。

內地樓價升勢未變

三月二十七日的一個星期，上海樓市成交金額繼續從谷底反彈，按周升65%，深圳及廣州持平，可見內地逐漸適應限購令的影響，交投有穩步回升迹象。中國政府對付樓市升溫，從限貸、限價，到限購，筆者深信，種種手段只能減慢內地樓市升勢，不會令大方向逆轉。

內地限購令出招後，有報道指，無限購的城市獲資金湧入催化炒賣。另外，有限購地區樓市，都只係呈現價滯量跌情況，可見內地樓市本身需求不缺，而中國經歷多年高速經濟增長，民間累積盈餘驚人，歸根究柢，資本市場未能同步配合發展，資金在苦無出路下持續流入磚頭市場。似乎增加資金成本，例如透過加息令負利率情況改善，以及加速發展資本市場疏導熱錢，才是根治樓市升溫的有效方法。

內房股近期走勢可人，始終股價悶足一年，基金趁藥力最猛的限價令出台，短期壞消息出盡炒落後，綜觀大部分中型內房股，重估後股價較資產淨值折讓兩成五至五成的比比皆是，除非是價量齊跌，單是量跌而價不跌，大部分內房股吸引力都唔錯。

加息造就上車機會

碧桂園（02007）首季合同銷售93億元人民幣，同比升45%，合同銷售建築面積144萬平方米，增長26%，美中不足的是，三月實質單月合同銷售25億元人民幣，未有從二月春節傳統淡季強力反彈，四分一年完成全年目標430億元人民幣的21.6%，或者可解釋是限購令初期，市場未適應，而且仲有三季可追，捧場客暫時不需要太擔心。

分析員計算碧桂園一一年底每股資產淨值介乎4.5至4.8元人民幣，較現價3.46元折讓35.4至39.4%。碧桂園預期市盈率10.4倍，股息率3.3厘，折讓收窄至30%左右相信是合理期望，約3.87元水平，如果出其不意的加息為內房股升勢帶來震盪，可以考慮趁調整買入。

順帶一提，股民以往想睇免費即秒股價，只能夠上money18網站，但依家方便好多，用緊iPhone或者Android手機的，可以下載money18應用程式，用手機可以睇到免費即秒股價，至於其他手機用戶，亦可以到m.on.cc，同樣睇到免費即秒股價，money18一於賣大包，益大家。