Fundman睇市：維達開始低位收集

美國聯儲局主席伯南克，自從將美息同就業市場盛衰掛鈎之後，每個月美國失業率及非農業職位增長數據，都變成預示美息去向的寒暑表。上周五數據稍勝預期，三月份美國失業率跌至兩年低位8.8%，非農業就業職位增加21.6萬份，是去年五月以來最高，較彭博綜合市場預測的19萬份理想。數據後利率期貨顯示，年底時息口高過目前0至0.25厘的機會率係38.7%，較一個月前的31.3%為高，可見美國加息預期又再升溫。

美國幾時退市？新增職位經已從去年十月開始，連續六個月出現正增長，累計提供了89.4萬份職位。伯蛇唔想提加息，其實都不無道理，事關○八年二月至一○年九月期間，815.2萬個美國打工仔唔見咗隻飯碗，計落今日增加嘅職位，只係等於金融海嘯流失職位嘅一成一左右，而且美國樓價仲响低位徘徊，過早退市，隨時會令就業及樓市出現第二輪惡化。何況近日歐債危機、日本核災，兩個央行都繼續向市場提供流動性，狂印銀紙，美國唔想美元大反彈影響經濟，惟有硬將零息政策盡量延長，最後通街係鈔票點收科？資金成本長期偏低，加上全球通脹高企，熱錢也最終會發現股票較持有實物的回報更好，所以筆者認為，今、明兩年股市不能睇得太淡。

水泥股好景有排炒

業績期每每是分析員同基金經理最忙的一段日子，藍籌及重磅股成績表出得七七八八，大致上，幾個行業特別值得注意；水泥行業的毛利表現普遍好過預期，3,600萬套保障房開始動工，毛利率高企的日子相信最少有十二至十八個月，水泥股再炒多三至六個月一啲都唔出奇！內房業績同樣喜出望外，最驚喜仲係普遍對今年銷售目標頗樂觀，一成五至三成增長預測比比皆是，管理層看來不怕限購令、保障房和按揭限制，炒內房折讓收窄的趨勢，應該仲未玩完，至少在第二季銷售數字出來之前吧！

內銀股除重農行（03618）較失望之外，就算連業績稍低過預測的建行（00939），都有追落後情況，原因係市場為人行抽緊銀根下，內銀壞帳增長及貸款放緩，做了過分審慎的預期。而隨着內地通脹有受控的迹象，風險溢價逐漸降低，內銀應該是第二季最值得重視嘅板塊。

加價成效有待觀察

較令人失望，要數最受原材料價格影響的食品股及工業股，廁紙及衞生用品生產商維達（03331），去年賺3.69億元，倒退7.3%，每股賺40.4仙，末期息8.7仙。木漿價格近年波動得交關，○八年中每噸900美元，跌至○九年最低560美元水平，近日急升，執筆時回到980美元。下半年，由於維達在低價時入貨的木漿用完，使毛利率收窄4.7個百分點，至29.5%，如果上下半年分開計算，毛利率更由32%跌至27.3%，是○八年下半年之後最低紀錄。

去年七月及今年一月，維達分別加價7%及3%，能否抵銷短期內木漿纖維受日本災情推波助瀾的升勢，仍有待觀察，始終木漿佔生產成本的五成七，中央會否管過龍，像叫停即食麵加價一樣，唔准廁紙加價，相當關鍵。

分析員預測，今年維達銷售額及純利47.6億及4.65億元，相當於8.7%純利率，比去年的9.7%收窄1%，大行都有心理準備，今年維達繼續受木漿漲價拖累，不過壞消息反映得八八九九，即使股價短期未必可以大反彈，但應該可以開始低位收集。