股海實戰： 興達盈利增長添動力

港股終於扭轉弱勢，上周五恒指成功突破23,500至23,600點水平阻力，收報23,801點，升274點，主板成交915億元，為四月股市來個「開門紅」，希望好嘅開始係成功嘅一半！

內地股市亦然，三月份PMI扭轉連續三個月下跌趨勢，滬綜指抽上全日高位收市，報2,967點，升39點。股友注意，A股清明節休市至本周三才復市。

若然四月份市況真係睇升，買邊個板塊好呢？水泥建材股已累積可觀升幅，再追入去未必值博；石油股上周五率先起動，中海油（00883）股價成功突破20元關，創歷史新高20.55元，單日升幅4.5%；中石油（00857）升2%；中信資源（01205）及MI能源（01555）分別升9%及7%。

阿莊就建議追入中石油旗下嘅昆侖能源（00135），事關班大戶坐貨已有一段長時間，上周五股價衝穿去年十二月高位，若然成功展開新升浪，爆發力不容低估，追入目標上試14至15元區域，跌穿11.2元止蝕。

農行有力挑戰5元

此外，內房及內銀股走勢唔錯，見上周五農業銀行（01288）喺4.45元曾出現1,200多個沽牌，共涉股數29.5球，踢穿呢條散戶長城，相信股價可以升多一成，即係叩5元大關。另一睇好嘅板塊係翻炒地主股，除咗阿莊揸住嘅恒地（00012）之外，亦可以關注新地（00016）相關的衍生工具。

又望番啲業績股，主營製銷子午輪胎鋼線嘅興達國際（01899），舊年生意額增長四成至54.3億元（人民幣．下同），純利增長44.5%至7.92億元，毛利率相對穩定，按年僅微降0.5個百分點至30.1%，每股派息15港仙，按年增50%。

去年汽車業產銷量創新高，為興達造就有利嘅經營環境，事緣中國市場佔興達收入的87.6%，而子午輪胎鋼線嘅50億元收入中，有38.65億元來自卡車，另外11.4億元來自客車；胎圈鋼絲嘅收入約4.23億元，整體業績理想。

雖然內地汽車業經歷過去三年嘅快速增長之後，今年增速放緩嘅可能性大，但相信以產銷量計仍會維持喺高水平，特別係農村加快發展，基礎建設將通過興建更多延伸至鄉郊地區嘅高速公路而進一步加強，貨運及客運量 也將會持續上升，有利於整個子午輪胎鋼線行業嘅持續發展。

另一點令興達可以較同類股估值享有溢價，乃其積極研發高毛利及新產品切割鋼絲，據講該新產品已於去年大量投產，預計今年嘅產銷量都會大幅增加，規模效益將為盈利帶來新嘅增長動力。

以興達現價計，往績市盈率十一倍，息率近兩厘，雖不算是十分便宜，但勝在可以揸得安心。市況相就嘅話，以一一年預測市盈率十三倍計算，股價可見雙位數字，6.7港元不宜有失。

money18幫到你手

講開又講，有睇開money18的讀者，當然知道這個免費平台有幾好用，依家用緊iPhone或者Android手機的股民，可以下載專用程式，介面靚靚之餘，更可以免費用盡money18大部分主要功能，例如睇走勢圖、相關新聞、監察投資組合變化等，無形中多咗個近身好幫手。

戰報

陽光能源（00757）

冼金基上周三睇中嘅陽光能源周五高見2.35元，跟佢於推介日低位2.01元上車，最多賺近17%。

資本策略（00497）

Sammi上周一揀咗隻資本策略，當日低位只係0.215元，上周五炒高至0.255元，一周計累升近19%。