酒店貴賓房 新地盤命名
今年以來新地（00016）賣樓態度保持積極，仲好識得幫樓盤宣傳。尋日太子發現，佢哋喺啱啱開業、全球位處樓層最高酒店─麗思卡爾頓酒店（The Ritz Carlton）都有花臣，就係將酒店內嘅中菜廳貴賓房，以新地旗下新盤命名。
新酒店搞推盤宣傳
新地好快會推出元朗尚豪庭呢個新盤，個盤標榜坐擁中港金光大道優勢，強調樓盤透過鐵路網絡連貫九龍站環球貿易廣場及中環國際金融中心等核心地標。為咗突出呢點，揸盤人新地代理項目總監張卓秀敏特地喺環球貿易廣場啱啱開業嘅麗思卡爾頓酒店做宣傳，太子就發現咗呢個有趣命名。
位處環球貿易廣場102樓嘅麗思卡爾頓酒店，有一望無際嘅景觀。中菜廳內7間貴賓房有6間都係以新地多年來熱銷紅盤命名，包括同樣由張太操刀賣樓嘅東九龍峻弦及太子道東譽．港灣，呢個做法都算係酒店嘅特色喎。
新地張卓秀敏昨日特地喺新酒店貴賓房內，做樓盤推廣宣傳。