股海實戰：深高速可搭轉順風車

港股繼續悶局一場，恒指高低波幅只有171點，主板成交僅674億元，下月期指低水19點。金魚缸人氣低迷，經紀每個交易日喺行多坐一粒鐘，生意照樣淡薄，難怪怨聲載道。

近期港股唔上唔落，除咗觀望即月期指結算及基金季結外，還有內地即將公布嘅經濟數據及預先反映四月人行加息。事實上，美股及內地A股經已重返日本三月十一日大地震前嘅水平，偏偏港股尚未能收復失地，向下沽壓暫亦唔見得好大。阿莊相信，待宏觀不明朗因素逐漸明朗化，而外圍股市又繼續向好嘅話，四月港股有條件追落後。

IPO活動蓄勢待發

講到四月，聽聞有多隻IPO計劃登陸港股，包括日本網上金融集團SBI、全球最大商品交易商嘉能，以及從事藥品分銷嘅泰凌醫藥等。阿莊都係嗰句，若然IPO成氣候，吸引啲錢回流，後市不用過分睇淡。

市場缺乏焦點，業績股波幅較大。重農行（03618）公布去年多賺62%，盈利達到30.64億元人民幣，較招股書預期數字為高，但股價卻見光死，尋日急挫12.5%，收報5.32元，成交15億元，相信與基金大手減持有關，暫不宜撈底。

此外，長實（00001）及和黃（00013）公布去年度業績，表現均優於市場預期。阿莊喺和黃股價六、七十蚊嘅時候已睇好，可惜去年末季股價升勢實在太快，一直唔敢追貨，結果睇住隻股10蚊10蚊咁上！今年一月中旬以來，和黃股價終於進行整固。呢期唔少股份業績好壞股價都捱沽，若然85元樓下有得上車，阿莊今次唔會再忍手，或分兩注入場。

息率吸引現價值博

繼續聚焦業績股，公路股深高速（00548）尋日股價異動，一度升至5.1元，收報5.03元，升4.36%，成交3,665萬元，已經平咗一月份嘅高位，由於成交配合，相信可向上突破，別錯失搭順風車嘅機會！

深高速去年度收入30.41億元（人民幣．下同），增長22%，其中路費收入增70%至21.52億元；純利7.45億元，增幅38%；每股盈利0.342元，末期息每股16分。

年內公司旗下各公路項目的車流量及路費收入，同比均錄得雙位數字的增幅，當中以鹽壩高速、南光高速、廣梧項目以及廣州西二環增長較為顯著。公司管理層指，今年路費收入目標不少於24.5億元，相等於按年增幅約13.9%；管理費用則不高於6.1億元，而去年為4.5億元。

公路股一個吸引長線投資者之處，乃擁有穩定而可觀嘅現金流。深高速去年從經營活動錄得嘅現金流入淨額和收回投資現金合計高達18.14億元，按年增加77%。隨着人民幣穩步升值，加上公司股息率有3.7厘，屬攻守兼備之選。業績公布後，投行德銀發表嘅報告將其目標價上調至6.6港元。阿莊保守啲，假設今年盈利增幅僅及去年一半，再按預測市盈率十三倍計算，股價都值6.2港元，現價值博，穿4.7港元止蝕。

戰報

華晨

（01114）

華晨尋日一度高見7.64元。志強早於本月十八日已經吼實，跟佢於當日低位5.84元上車，勁賺近31%。

兗州煤業

（01171）

尋日兗州煤業炒高至27.3元。May於本月十五日已作推介，若當日低位23.45元跟進，升超過16%。