太子手記：永亨業績靚 管理層重酬
永亨銀行（00302）早前公布嘅業績好靚仔，盈利上升咗35%，有成16.25億元。太子覺得已經交足功課，唔知係咪咁嘅原因，班管理層嘅酬金亦都好鬼和味，就好似佢哋董事長馮鈺斌（Patrick），花紅加酬金已經有成2,060.7萬元，比前年上升咗26%。
馮鈺斌多袋26%
太子睇埋其他管理層，高級總經理馮鈺聲（Michael）嘅花紅加酬金就升咗29%，有1,066萬元，副行政總裁王家華（Frank）都有29%加幅，穩袋1,316.9萬元。太子真係好羨慕，我哋呢啲打工仔一年加個3%已經算好彩。
不過，太子喺度諗除咗我哋呢啲打工仔眼紅佢哋，相信班中資銀行管理層都會好心噏。
佢哋個個成績表都交足功課，但係好多行嘅管理層人工就與成績相反，人工不斷咁縮水，雖然佢哋好忠心，人工減都繼續畀心機做好個業績，但希望下年佢哋人工可以加番啲，補償番呢班勞苦功高嘅管理層啦！
永亨董事長馮鈺斌花紅加酬金達2060萬元。（資料圖片）