股海實戰：中糧調整完成彈力強

港股上周重上23,000點樓上收市，表現比預期好，主要係內銀股中行（03988）業績優於預期，提振內銀板塊表現，加上日本核危機受控，外圍股市亦趨穩，淡友平倉。展望本周，市場焦點放喺長和系業績、期指結算及基金季結，而四月份可以留意IPO活動會否轉趨活躍。

企業公布業績進入高峰期，但上周唔少業績股股價都見光死，好似上周五，利豐（00494）、達進（00515）、廣南（01203）及中化化肥（00297）跌幅介乎6.7至10%。反而，內房股氣氛持續改善，中國海外（00688）上周五再升3.1%、富力地產（02777）及雅居樂（03383）分別升4.68%及2.4%。究竟今輪反彈幾時止步，睇實龍頭股中國海外表現可找到線索。

金威值得憧憬

上周阿莊買入嘅恒地（00012），股價突破50元關，上周五收報51.75元，一周升幅9%。短線企穩50至51元水平，次季目標反覆向60元關進發。此外，早前提及嘅啤酒股金威啤酒（00124），上周五股價亦見異動，全日高位2.34元，收報2.32元，升5.46%。阿莊遂入場湊熱鬧，以平均價2.3元買入10萬股。若然華創（00291）入股交易順利完成嘅話，估計故事尚未完結，最佳結果係華潤啤酒借殼金威啤酒上市，就睇吓呢個美麗嘅猜想能否成為事實！

食品股有追捧

日本禍不單行，地震加海嘯，最難搞係核電廠洩漏，災區農產品受輻射污染，打擊農產品出口，本土人食品安全亦出現問題，一般預期日本或會加大進口食品以應付需求，故見上周食品股有追捧。阿莊提過一直有產品出口日本市場嘅中國綠色（00904），上周五曾高見6.41元，收報6.37元，一周升幅23%。

講開食品股，中糧控股（00606）上周五股價亦見異動，曾高見8.7元，收報8.61元，升5.5%，成交2.3億元，公司將於本周三公布業績。早在今年一月，公司已就去年度業績發出盈警，預期盈利按年減少約13%，主要係由於油籽和大米業務盈利同比下降所致。

受盈警消息影響，中糧股價以大成交插穿8元關，之後在低位徘徊，最低曾見7.6元，橫行兩個月，已消化負面消息，上周五以大成交重上10日及50日線，似係調整完成訊號。

呢期唔少企業公布業績符合預期，股價反而見光死，好似中糧咁，提早兩個月發出盈警，讓市場有足夠時間消化負面消息，照計要沽嘅已經沽咗，唔沽嘅呢啲位亦唔會沽。更何況大行未有因為盈警消息而大幅調低其盈利預測，主要有見是次負面影響只屬短暫，隨着公司致力擴充產能，長遠盈利前景穩步向好。且看本周公布業績中展望部分能否帶來正面訊息，暫看股價向上較大阻力喺9.5元，回吐須考驗8.15元承接。該股上周五收報8.61元，升0.45元。

戰報

環球乳業（01007）

Sammi早於本月十八日睇中隻環球乳業，於當日低位2.64元上車，上周五高位3.19元食胡，累賺近21%。

雅士利（01230）

史提芬上周四話雅士利中期業績前有炒作，翌日就最高炒上2.76元，較推介日低位2.46元，升逾12%。