中石化蘇樹林夠班做省長
內地企業人事變動好平常，最新例子係中石化（00386）董事長蘇樹林，市場傳佢會調去福建省做代省長兼省委副書記，太子嘅老友話，件事喺中石化系內早有聽聞，但邊位會頂替董事長反而冚得好密。
歷練豐富魄力足
○七年六月蘇樹林臨危受命，空降中石化出任總經理職務之時，中石化系內人早就話佢年輕有為。佢係「六十後」，四十幾歲就坐到去相當於正部級嘅職位，歷練又多，喺大慶石油學院畢業後，做過大慶石油管理局局長、中石油集團副總經理、遼寧省委常委同組織部部長。同佢共事過嘅人都讚蘇董做事有魄力，又有豐富嘅管理經驗。