股海實戰：上實城開有條件炒折讓

日本福島核電廠成功通電，加上不停注水收效，局面初步受控，解決危機終現曙光。若事件朝好嘅方向發展，配合G7入市干預行動，短期全球股市可望逐步回穩，只係港股上周表現不尋常地疲弱，短期投資者未許掉以輕心，若周末前揸好倉，周初要把握機會食胡！

事實上，地緣政治不明朗因素尚未完全消除，近日西方盟軍開始攻打卡達菲，利比亞局勢添變數，若然事件演變成恐怖分子報復西方國家，情況更糟，宜密切留意事態發展。

內銀股有留意價值

人行上周五宣布上調存款準備金率0.5個百分點，符合市場預期。如今看來，人行下一次加息行動可能喺四月份才出現。本月底期指結算及基金季結，若然見到恒指比外圍市況波動，實不足為奇。若恒指跌穿22,000點，有銀士可開始留意分注入場吸納實力股嘅機會。嚟緊又到內銀股業績期，此前建行（00939）、工行（01398）及交行（03328）股價若再跌半成，估值具吸引力。

阿莊本來唔多睇好美股，認為當地經濟復甦進度緩慢，道指既已累積可觀升幅，再上動力何來？不過，聯儲局上周五喺做完9家大銀行嘅壓力測試之後，決定容許銀行增加運用資金嘅彈性，個別大行可增派股息，亦可回購股份及償還債務。咁做法會加快銀行休養生息，銀行板塊重現活力，將為美股注入新動力，故美股後市亦唔可以睇得太淡。

上周五多隻內房股做好，中國海外（00688）升6.5%、雅居樂地產（03383）升7.34%、保利香港（00119）升4.7%、富力地產（02777）及綠城中國（03900）分別升4.8%及6.7%。

講開內房股，阿莊持有嘅上實城市開發（00563）剛宣布去年度業績，收入增長七倍至41億元；虧損則由前年嘅21億元大幅收窄至7.49億元。截至去年底手持土地儲備建築面積達1,271.6萬平方米，手頭現金23.8億元。

財務狀況明顯改善

去年，上實城開引入上實（00363）成為新控股股東，財務狀況大為改善，對公司董事會進行了重組，新人事新作風。展望今年，西安、成都、重慶及上海項目將帶來銷售收入。屈指一算，截至去年底，上實城開嘅資產淨值約76.4億元，相等於每股資產淨值3.31元，流動比率約為1.56，淨借貸比率由前年底嘅69.1%大降至37.2%，財務狀況明顯改善。現價較每股資產淨值折讓22.9%，市帳率0.77倍。

一家有上海市窗口公司作為控股股東嘅內房企業，資金面不成問題，手頭亦不缺項目，未來在尋找新項目方面更事半功倍，現價估值實在偏低。該股股價上周低見2.22元後現反彈，上周五收報2.55元，若然嚟緊再下試低位承接，阿莊考慮入場增持，至少可博重上每股資產淨值水平。

戰報

雅居樂（03383）

史提芬上周四話雅居樂業績有驚喜有得炒，當日低位只係9.75元，上周五升抵10.92元，短炒賺12%。

三林環球（03938）

阿莊於上周一貼中三林環球，上周五升抵0.78元，以推介日低位0.7元計，最多賺逾11%。