Fundman睇市：中移應該提高派息

新聞所見，搶完奶粉，輪到搶鹽，到底係核輻射恐怖啲？定係自己嚇自己恐怖啲？令人迷惑。

然而，港股成為亞洲股市「弱中之弱」，基金經理眼中的ATM，卻是鐵一般事實。恒指尋日跌416點，報22,284點，跌幅1.83%。跌幅排在亞洲第一，較諸受核輻射威脅的日本股市的1.44%跌幅更大，美電由地震前的7.90水平起步，抽升至7.8018，反映資金從港元區流出迹象。

查實港股自去年十一月，中央更嚴肅地處理通脹問題，連環收緊市場游資開始已經無運行，中資股跌咗唔短日子，基金經理急住要錢，搵股票開刀，惟有揀一眾Outperformer（跑贏大市的強勢股）落手，年初至到地震發生為止，5隻表現最好藍籌，騰訊（00700）、和黃（00013）、中遠太平洋（01199）及招商局國際（00144）跌幅都超過3%，只得聯通（00762）因為中移（00941）的換馬資金頂住，跌得比較溫和，連強勢股都洗埋，相信大市掟貨潮都會更近尾聲。

騰訊短期續受壓

騰訊由年初169元起步，去到地震前高位228.8元，升咗接近60元，氣勢一時無兩，點知業績一出，一日跌番23.6元出街。

騰訊去年賺80.54億元（人民幣．下同），作為中國網股一哥真係當之無愧，業績亦係市場預期的77.9億至87.1億元之間，無奈之前幾次業績，騰訊都習慣咗畀市場驚喜，今次成績表相對顯得平淡。

由大行評論所見，普遍認為收入增長還可以，可惜純利受部分遊戲毛利率未達預期拖累，往績市盈率三十七倍，坊間估今年賺109.9億元，增長36.4%，PE降至二十七倍，股價大插插之後，抵買指數PEG仲係高過最低要求一倍些少，係1.016倍，在大量放洋的中國網股好似Youku、百度及Focus Media等可以選擇底下，基金短期貪新忘舊，騰訊短期恐怕仲有一定壓力。

另一隻業績對辦，但股價一樣好似核反應堆咁熔解嘅中移（00941），成績表出來幾乎同大行估計一模一樣，收入及純利分別升7.3%及3.9%，至4,852億元及1,196億元。

坐擁逾2000億現金

這間擁有5.84億用戶，全球最大流動電話公司，在內地寡頭壟斷的市場上，生意唔憂做，財政狀況更是健康到無人信，單係手頭淨現金已經有2,580億元，市值1.38萬億港元或者1.16萬億元人民幣，市盈率得9.7倍，減埋現金更得7.5倍，估值平到離晒譜。

中移可說是一大示範，解釋乜嘢叫政策性風險，內地發展3G，中央要三家牌照經營商平衡發展，把全球獨有的TD-SCDMA制式塞畀中移，硬件貴、研發效益低之餘，最弊係手機選擇唔多，至少近年帶動唔少網絡商鹹魚翻生，數據用量大增的iPhone與iPad，就沒有TD-SCDMA制式版本。據知現在內地潮人都揸兩部電話，一部iPhone用聯通網絡上網，但礙於通話質素關係，故留番一部中移手機作話音通訊之用，死未？

要解決股價低迷困局，管理層應該考慮增加派息，坐擁2,000多億現金，大把條件咁做，可惜中移只係維持派息比率在四成三，先不談百分百派走現金，即使調高到六成，股息率已經去到6厘，比大部分公用股高，相信好多中移股東都同筆者一樣，期待有咁嘅一日出現。