股海實戰：中國自動化購併有錢途

日本核洩漏危機尚未解決，歐盟能源專員指情況近乎失控，就連日本最佳盟友嘅美國都被嚇驚，美股前晚大跌收場，而繼法國後，美國及英國都呼籲公民撤離災區及東京。究竟呢個亂局點樣收科，真係要問個天。此刻風雨飄搖，總之平安最重要！

全球人心惶惶，據報美國民眾近日搶購碘化鉀補充劑，亦有內地無良商人睇準民間對核洩漏嘅恐慌，喺市場散播各種謠言，炒高鹽價。尋日炒風南來香江，上晝返證券行，見到常駐阿太兵團未有就位，下晝見面才知去咗撲柴米油鹽，真係冇嘢好講！上晝亦見到金魚缸中，個別內地乳品股有炒味，下晝就連金源米業（00677）、中國澱粉（03838）都炒起，但阿莊相信此風難長，跟炒宜見好識收。

前日核能股有反彈，冷不防收市後傳來國務院下令暫停審批核電項目，並對現有項目進行全面安檢，核能股再次全線告急，東方電氣（01072）跌逾8%、上海電氣（02727）及哈動（01133）同跌逾12%。政策陰霾一日未消，呢類股難以翻身。

反觀風電及太陽能股則繼續輪流炒作，龍源電力（00916）及中傳動（00658）分別升逾3%及6%、就連細價股亦見炒風，航天萬源（01185）及卡姆丹克（00712）分別升9.5及8.2%。如今可供短炒嘅選擇唔多，呢個板塊可吸引炒家目光。

藍籌股中移（00941）及騰訊（00700）繼續捱沽，相信沽壓來自基金減持套現，而非關業績。事實上，就連一直表現偏強嘅和黃（00013）及長實（00001）股價均受壓，阿莊一直後悔冇買和黃，話唔定嚟緊可以喺80元邊上車！

人行公布首季度儲戶問卷調查報告，結果顯示，內地居民消費意欲下降至十二年來最低位，反映喺樓、股二市表現不濟，通脹升溫之下，內地消費市場受到影響。體育用品股李寧（02331）業績公布後股價受壓，尋日急挫逾一成，龍頭股表現既如此，似乎此板塊估值下調浪潮尚未完結。

未受海外市場影響

再睇業績消息，中國自動化（00569）公布去年收益增41.7%至15.94億元（人民幣．下同），純利增34.7%至2.85億元；每股盈利28.11分，末期息每股7港仙。

公司主要從事整合及銷售應用於石化及鐵路嘅安全及緊急控制系統，兩大客戶類別佔收入比例相若，但若以經營溢利計，去年石化行業相關業務增長較快。今年公司將增持吳忠儀表額外30%股權，另外，由於海外業務僅佔總收入約5%，業務受海外市場波動影響有限。

內地工業自動化乃大勢所趨，而其中石化及鐵路業有一定嘅入行門檻，中自化往績良好，且將透過購併擴大市場份額，前景可看好。按過去三年盈利平均年增長近五成計，現價一一年預測市盈率降至十二倍，股價回落至5.5港元樓下可留意。

戰報

錢進周三睇中嘅卡姆丹克繼續受捧，尋日炒上3.58元高位，於推介日低位3.08元上車，兩日賺逾16%。

May同日都貼中隻金風科技，於當日低位13.42元上車，尋日最高升抵15.2元，跟走一轉都賺超過13%。