股海實戰：雨潤投機買入博反彈

全球目光都集中喺日本福島嘅核洩漏危機，日皇亦罕有地出嚟講話替國民壓驚。日本股市喺日本央行多次向市場注資下終見反彈，但相信喺核洩漏危機獲妥善解決前，日股表現仍然反覆。

港股方面，恒指尋日曾反彈逾百點，中移（00941）中午公布業績表現符合市場預期，午市初段未見異樣，冷不防三點後有大量飛機沽盤殺到，股價質低至70.85元，收報71.05元，跌1.6%，相等於恒指跌28點，結果恒指收報22,700點，僅升22點，主板成交841億元，論走勢唔多對辦，主線宜繼續以守代攻。

前日人行喺公開市場發行一百億人民幣一年期央行票據，發行利率上行約二十個基點至3.1992%，超過一年期存款基準利率，惹來市場憂慮短期內人行將會加息。德銀發表嘅研究報告就預期，人行或在三至四月再加息，之後本輪激進嘅緊縮政策周期可能會隨之結束，持續性嘅利率和信貸收緊政策節奏將會減緩，年底前只會再加息一次，投資者不妨作為參考。

個股消息方面，藍籌股中，除了中移宣布業績外，騰訊（00700）亦發成績表，去年純利80.5億元人民幣，按年增幅56%，表現符合市場預期。從事新興產業，發展至一定規模，手執行業牛耳，要繼續維持每年盈利高增長，並唔容易，騰訊嘅處境可以想見。但阿莊相信，世界天天在變，尤其係互聯網世界無邊界，只要企業保持創新嘅能力，憑着內地數以億計嘅網民，以及三網融合嘅國策作為強大後盾，騰訊長遠前景樂觀。

近日內地官方傳媒報道，河南省大批豬場喺飼料中混入國家禁用嘅瘦肉精，更指龍頭肉類加工商之一嘅A股公司雙滙集團，其位於河南濟源嘅加工廠涉嫌長期採購這些含瘦肉精嘅豬肉作為加工，消息令雙滙股價前日下午急跌，尋日停牌，待調查結果。

競爭對手受打擊

今次事件，對近年業務發展迅速嘅雙滙，猶如當頭棒喝，亦再次反映肉食加工商為求應付日益增加嘅加工產量，喺原料來源質量把關不足嘅後果，足以對品牌造成嚴重打擊。

阿莊還記得，雨潤食品（01068）喺前年四月，亦曾因附屬阜陽雨潤肉類加工發現小批量午餐肉產品含有微量瘦肉精，以致股價下跌，幸好公司及時披露及跟進情況，並採取措施對原材料進行更嚴格嘅監控，結果其後股價好快就重拾升軌，現價較當時股價已翻一番有多。

經一事，長一智。畢竟內地肉食加工業產量化嘅日子尚淺，內地人均工資不斷上升，消費群不斷壯大，豬肉又係中國人嘅主食，相信個別事件不影響行業長遠發展。至執筆為止，今次瘦肉精事件只涉及雨潤嘅競爭對手，但雨潤股價卻已連跌兩日，若然事件發展下去，確與公司業務無關，相信股價反彈可期。短線守22.5至23元區域可投機性操作，博三月廿九日業績消息報佳音，反彈目標睇26元，跌穿21.8元止蝕。

戰報

尋日東岳強勢創新高5.74元，志強於本月一日已經睇中，於當日低位4.98元上車，跟到足賺逾15%。

Sammi上周二推介嘅西部水泥尋日亦受到追捧，高見3.38元，較推介日低位3.01元，累升逾12%。