太子手記：海通黃紹開功成身退
金融界嘅音樂椅今年未停過，今次嘅主角就係「雙黃」——黃紹開（Peter）同黃耀明（Bruce），仲要咁啱兩人都曾經喺海通國際證券（00665）共事過。
海通宣布，服務咗海通（前稱大福證券）二十三年嘅Peter，會辭去行政總裁、副主席同董事總經理等職務。
太子問唔到Peter點解要走，不過行內人士估計，大福嘅股權賣咗畀海通都一段時間，Peter作為老臣子，協助公司過渡，可以話係功成身退，依家走都唔意外嘅。海通嘅公司通告都話，Peter同董事會之間並冇任何意見分歧。
黃耀明告別建達
此外，李明山都會辭任非執董、主席職位，未來的主席職位就會由現任非執董吉宇光擔任。
縱橫外匯界多年嘅黃耀明，亦已辭去建達（香港）策略分析主管職位。Bruce去年初由工作咗四年多嘅海通轉去建達。
黃紹開服務咗海通二十三年，終於可以功成身退。（資料圖片）