股海實戰：康師傅買貨毋須心急

日本大地震加海嘯已夠慘，誰知加埋核輻射洩漏危機，令整個日本處於惶恐之中，日股尋日狂插逾一成，拖累全球股市大地震，恒指一度跌逾千點，收報22,678點，跌667點，主板成交大增至1,092億元。聽大行交易員話，日本基金狂沽貨班水回國，難怪成交大增，睇怕冇咁快會沽完貨，要撈底切忌心急！

事實上，尋日跌市，唔少主營業務並不涉及使用來自日本嘅原料，亦非主銷日本市場的股份照樣要跌，一來投資者持貨信心動搖，二來有大戶長倉沽貨，至會有金魚缸人踩人、要錢唔要貨嘅情況出現！

安全能源股有追捧

經驗告訴阿莊，呢種情況係「危」亦係「機」，只係考慮到天災呢家嘢真係冇得估，唔知九級大地震之後仲有冇嘢跟尾，加上核洩消息透明度低，事件又可大可小，短期風向轉變亦足以影響鄰近地區，暫時都係以不變應萬變。

今次日本核洩事件，令全球關注核能嘅安全問題。大家都知日本科技水平唔低，眼見連日本都搞到倒瀉籮蟹，各新興國豈不心慌？故見內地A股核能板塊繼續跳水，港股亦出現類似嘅情況，東方電氣（01072）股價連日急挫，尋日曾低見24.65元，收報26.45元，跌5.37%。

反觀被視為安全能源嘅太陽能及風電股有追捧，金風科技（02208）逆市急升逾9%、龍源電力（00916）及中傳動（00658）亦同升逾2%，成逆市奇葩，但當然，如此波動全出於市場嘅臆測，將來政策變化如何冇人知，故只可抱着投機心態小注怡情。

再睇番恒指波幅走勢圖，雖然尋日恒指重上波幅區底部22,400點樓上收市，但目前已失守10日及50日線，而250日線則處於22,026點，萬一短期再次失守22,400點，則22,000點危危乎。大單邊市結果開低，與阿莊月初嘅估計相符，只係萬料不到日本大地震成為協助淡友嘅東風，真係天有不測之風雲！

食品消費前景樂觀

阿莊慶幸先前已着手減磅，如今一半持倉係現金，若月底期指結算前恒指插穿22,000點，可以開始留意各心儀實力股表現。實力股中，阿莊認為中資食品股可關注，事關未來五年內地國民平均收入會明顯上升，居民購買力增加，中國人「民以食為天」，食品消費市場增長前景可觀。見到康師傅（00322）尋日大跌市中表現算係硬淨，曾高見19.8元，收報19.44元，升0.83%，成交1.64億元。

早前兩會通過調高個人稅起徵點，消息利好食品股表現，康師傅股價借勢由上月底低位17.32元反彈上19元樓上，剛收復250日線。短線能否持續回升，下周一公布嘅業績表現值得關注，另一變數係呢隻股多基金持貨，會唔會受今次日資撤退影響，尚屬未知數，所以買貨唔使心急，最好等再試上月低位承接，再謀定而後動。

戰報

萬德資源（08163）

錢進周一睇中嘅萬德資源，尋日逆市抽高至0.124元，較推介當日低位0.098元，累升超過26%。

金風科技（02208）

姚午齊本月二日話金風科技調整完成，於當日低位12.6元上車，尋日搶高至14.28元，累升超過13%。