港過百萬人熱衷投資
尋日恒指一度跌過千點，當堂成為街頭巷尾嘅討論熱話，太子覺得港人對投資消息真係非常關注。星展香港董事總經理兼香港及中國內地零售銀行業務總監王潔鳳（Linda）更加話，全港嘅投資人口可能高達125萬。
星展委託咗研究機構做調查，約有三成十八歲以上人口，喺過去一年曾經參加過投資活動，按推算即係約有125萬人；當中更加有86%投資者有意喺未來半年投資股票，投資外匯同基金嘅，都有45%同41%。
資訊靈通搶佔先機
Linda仲話，調查發現，資產總值愈高嘅投資者，對預測大市走勢嘅觸覺愈敏銳，好似有過百萬資產嘅投資者，佢哋往往較能洞悉先機，掌握到大市嘅走向同波幅。
Linda話可能同佢哋獲得資訊嘅途徑有關，因為佢哋有超過四成人，會透過財富管理經理得到相關資訊，係其他資產值人士嘅三倍。