短炒倉：華潤微電子憧憬業績

雖然港人大部分對日本地震災民都寄予無限同情，但去到金魚缸就唔會感情用事，一眾災難受惠股尋日都炒得不亦樂乎。不過睇番○八年四川地震為例，當日所謂的災後概念股，炒作一陣之後多數都係打回原形，例如當日憧憬重建會帶動水泥需求，結果當地水泥反而因為大量增產而出現供過於求，令價格大跌，所以勸大家炒吓無妨，但不要太認真，只要諗吓日本市場的對外開放程度有幾大，就可以知道一啲所謂受惠股，根本係得啖笑。

半導體業處上升期

半導體股尋日亦因日本廠商停產而炒上，志強愛股之一嘅華潤微電子（00597）升3.85%，收報0.405元。但其實就算唔計地震因素，單係近幾年全球消費電子產品市場的興旺，已經足以令半導體行業重踏上升周期，加上旗下綠色照明和節能產品業務亦同樣表現出色，故華潤微電子去年中期業績已成功扭虧為盈，賺1.26億元，而即將於下周二（二十二日）公布的全年業績，更加惹人憧憬，以全年賺3億元計，每股盈利0.034元，市盈率不到12倍，上番五十二周高位0.47元，亦不到14倍，止蝕可訂0.37元。

華潤微電子（00597）目標價：0.00元 止蝕價：0.00元