股海實戰：中旅估值缺乏吸引力

日股尋日跌6.2%，創○八年十二月以來最大單日跌幅。短期內日本尚有餘震，而核設施安全亦成疑，日揆形容今次乃二戰後國家面對嘅最大危機，一點也不誇張！

那邊廂，中國人大會議閉幕，會議通過「十二五」規劃，內地股市先跌後回升。國務院總理溫家寶強調，喺基數擴大之下，「十二五」期間GDP平均年增7%不算低，仲話要徹底改變唯GDP嘅觀念，取而代之係教育經費佔國民經濟嘅比重，以及研發經費佔生產嘅比重。呢番話充分反映當今中國政策制訂者嘅目光長遠，實事求是。

三林大炒重建概念

港股亦隨內地股市高收，恒指收報23,345點，升96點，但主板成交降至651億元，投資者入市態度審慎。仍停留喺金魚缸炒作嘅資金，主攻業績股及災後重建概念股，阿莊尋日發掘嘅三林國際（03938）果然有料到，開市價0.73元，曾回落至0.7元，全日高位0.77元，收報0.73元，單日升幅12%，成交4,567萬元。

由於是次地震影響日本電子企業嘅廠房運作，這將難免對全球晶片業供應格局造成影響，晶片股有買盤追捧，中芯（00981）及華潤微電子（00597）均升逾3%，先進半導體（03355）升4.6%。不過，有人歡喜有人愁，東方電氣（01072）及億和控股（00838）分別跌逾9%及5%，前者擔心日本核設施安全事件會拖慢內地核電發展，後者主力做日本客戶，令人關注定單或添變數。

事實上，今次日本大地震與九五年神戶大地震之分別，除了今次地震級數較高外，結合海嘯及核設施輻射洩漏嘅威脅，亦令今次天災嘅破壞力變得史無前例，重建須時或會較長，周邊地區能否把握機會加快發展，從中得益，相信正係大行分析員正在深思嘅問題。

發展步伐有待提速

回說個股，留意到久未見有動靜嘅中旅（00308）有異樣，尋日收報1.7元，升3%，成交2,737萬元。喺眾多老牌紅籌中，中旅近年嘅表現令到唔少捧場客失望，皆因業績欠佳，未能充分發揮喺內地旅遊業所享有嘅先天優勢，近幾年公司投入頗多資源開發嘅兩個海泉灣項目，實際效益亦有待顯現。

去年五月，中旅股價見全年低位1.47元，及後反彈受制於2元關並再展跌浪，上月下旬低見1.52元才告回穩。現價市帳率僅0.8倍，股價折讓反映市場對公司發展緩慢嘅不滿。正當不少中資企業近年都響應國策，透過重組兼併提升效益，做大做強，中旅嘅發展步伐顯然極有待提速。

喺求變出現突破前，阿莊不敢對中旅嘅業績與股價表現存太大期望。即使去年業績重現增長，以現時達97億元嘅市值，喺缺乏重組購併嘅消息之下，估值缺乏吸引力，股價將繼續停留在1.5至2元區域上落。

戰報

首都創投（02324）

志強上月二十五日睇中嘅首都創投，尋日炒高至0.455元，較當日低位0.365元，跟到足勁賺近25%。

華潤水泥（01313）

Sammi本月一日吼中華潤水泥，信佢於當日低位6.05元上車，尋日高位6.83元食胡，已賺近13%。