評加時成效李小加話太早
港股今個禮拜一開始加時，咁啱碰上市靜兼跌市，成交不升反跌，每日只維持600億至700億元成交。經紀聲音多多，有啲抱怨「悶到打瞌睡」；有啲仲誇張到話「唔見時間仲慘過唔見錢」咁話喎。
港交所（00388）行政總裁李小加尋日出席證券學會午宴，被問到加時四日嘅成效時，佢就即時解圍話：「四日唔食飯就話耐啫，加時四日講成效就太早了！」呢吓「四両撥千斤」，完全表現佢嘅急才，並且即時得到全場掌聲。
加時係個大趨勢
李小加之後就話，加時對市場嘅影響仲需要更多時間觀察，但呢個係一個大趨勢，尤其係未來如想吸引內地投資者來港、同QDII嘅資金等，香港金融市場嘅基建設施就必須要進行調整，以適應內地投資者，否則未來就難以繼續吸引內地投資者來港。