增供應遏炒一廂情願

今個禮拜，政府開倉派錢成為咗最熱門嘅話題，不過派得嗰6,000蚊，對樓市交投當然冇絲毫影響喇。反而，預算案之後市場迅速明朗化，樓市升溫嘅速度，就真係令大家有啲「始料不及」，但新盤陸續出籠，係唔係會令樓市更熾熱呢？就真係要觀察多三兩個大盤嘅銷情，先至可以下結論。因為綜觀依家嘅市況，並非一手市場全面性咁興旺起嚟，某啲偏遠地區嘅新盤，似乎仍然慢熱一啲；有一啲一線尾二線頭地區嘅二手市，都有咁嘅情況。

起樓推盤 發展商掌控

早排政府公布嚟緊一年度嘅賣地計劃，諗住以「海量」嘅供應去壓抑樓價，市場當然唔多理佢哋喇，皆因「遠水不能救近火」係大家一早已經預咗嘅嘢，而且所謂嘅供應，全部都係嚟自私人市場，靠地產商吸納土地、發展然後推出市場，但係在商言商，地產商梗係會因應自己嘅財政狀況，同埋幾時可以賣得好價嚟決定幾時推出市場，尤其財雄勢大嘅大型地產商，更加有能力可以揸住啲地皮慢慢發展，政府嘅所謂供應，其實真係一廂情願，咁你話究竟可以對樓價有幾大嘅紓緩作用呢？

今次賣地計劃除咗數量多之外，另一個比較特別嘅就係，喺將軍澳密集式咁推出7幅地皮，確係歷年少見，亦都係將軍澳區樓市嘅一個轉捩點。Paul少想講嘅，唔係話嗰區樓市從此冚檔，或者從此要落後大市，反觀對於嗰區係「有危有機」。

將軍澳未來規劃發展中，有唔少私人住宅地皮未推出，呢個係早十年八年前已知嘅事實，嗰區嘅樓價，其實多年嚟都一直反映緊呢個現實，所以過去呢段日子，將軍澳雖然差唔多等如東九龍嘅一部分，而且有專屬鐵路貫通，但樓價一直都只能同馬鞍山、荃灣等地區睇齊。今次政府推地皮，變相「標明」咗潛在供應喺邊度，反而可以具體咁畀大家睇清楚未來嘅具體發展，而且今次呢7幅地皮，都係喺規劃中嘅將軍澳市中心，咁亦都意味住「擺」咗喺度多年嘅市中心填海地皮，發展會正式啟動。

後市明朗 睇樓量爆升

呢啲地皮都係私人住宅用地，都會係發展規模比較大、配套齊備嘅屋苑，樓價水平唔會低，可能成為市場最大嗰幾家地產商囊中物，樓價或推出市場嘅「流量」都會變得穩定。地區經理同Paul少講，喺政府公布咗賣地計劃後，將軍澳市中心屋苑嘅睇樓量，爆升得好快，買家態度都好積極，只係成交唔能夠配合。業主同買家對未來區內供應大增嘅「舊聞」，都係處之泰然。