關百良為散戶提早開舖
下周一係香港證券界嘅大日子，港股交易時段會延長一粒鐘，有唔少證券行都已經做好準備，希望屆時可以開市大吉，時富金融就係其中之一！
時富證券董事關百良話，交易時段只係延長一小時，而市場嘅資金又咁穩定，估計交投唔會因為「加時」而大升，不過如果將來進一步延長交易時段，成交就應該增加！
熟客叫送叉燒飯
佢仲聽到有熟客講笑咁話：「如果再加時，食午飯就好趕，你哋可能要派埋叉燒飯喇！」
佢仲話時富嘅前線員工一向返朝九晚六，依家早咗開市，佢哋早半粒鐘返工做準備工夫，而收工時間亦會提早半粒鐘，工時冇加長！時富為咗方便散戶，證券行仲會喺早上八點半提早開門。