股海實戰：中國製藥具炒分拆概念

只懂說「何不食肉糜」嘅政府，製作一份「爛」預算案，搞到香港滿城風雨，結果要打倒昨日的我，向大部分香港市民每人派發六千大元，加埋退稅，一來一回多使百幾億銀先至平息到民憤，眼見政府如此無能，港人心淡，只有自求多福，上大人看在眼裏，相信亦心中有數！

年滿十八歲永久居民人人獲派六千大元，阿莊睇見退休老股友最嗒糖，而年滿十八歲，但尚未踏足社會嘅年輕一輩，相信亦感到興奮。站喺商業及投資角度，商家勢必把握政府發放現金時機，推出新嘅娛樂消閒產品以分享這數以百億元計嘅商機，投資者亦不妨留意呢方面嘅安排捕捉炒作消費股。

外圍股市前晚受油價上升拖累而低收，恒指低開逾兩百點，一度插穿23,000點，幸內地A股表現唔係太差，港股尾市亦收窄跌幅，恒指收報23,048點，跌347點，大市成交額699億元。

市場關注兩會期間討論醫藥產業「十二五」規劃內容，尋日A股醫藥板塊做好。港股方面，廣州藥業（00874）曾高見11.84元，收報11.72元，逆市升2.8%；中國製藥（01093）股價亦成功考驗5元承接，全日最高報5.31元，收報5.11元，逆市升1.38%。

成藥業務表現佳

近日市場盛傳，由工信部牽頭制訂嘅《維生素C行業准入條件》可望在新版《產業結構調整指導目錄》公布後出台，透過提高入行門檻以整頓行業產能，最終做到提高行業集中度、穩定產品價格，類似中藥這類龍頭企業勢必能夠成為大贏家。

講到中藥，其實另一個利好因素，係公司嘅收益結構得到根本改善。中藥以製造原料藥起家，當中又以維C及抗生素系列為主，喺全球市場可謂手執牛耳，但正由於原料藥行業存在一定嘅周期性，致使過去中藥嘅盈利表現呈大上大落，市場給予嘅估值亦未見理想。

近年公司開始積極發展成藥業務，藉此降低收益表現受原料藥周期性嘅影響，並建立新嘅盈利增長點，結果見到成效。去年首九個月，成藥業務為公司帶來16.77億元收入，經營溢利1.38億元，長遠而言，估計可朝獨立分拆上市嘅方向進發，公司估值亦可因此獲得提升。從過去一年中藥嘅股價走勢可見，正營造大圓底回升態勢，若要押注醫藥股，可視為值博之選。

money18 助你縱橫股壇

阿莊又有好介紹，市場訊息千變萬化，要掌握最新市場動態及消息，看官可即上money18.on.cc查閱免費即秒股價及市場資訊；iPhone手機用戶更可透過money18 app獲取最新炒股訊息。此外，打電話聽上日行情電話熱線：2795 8888，更為閣下提供詳盡的股票報價資料。

戰報

招金礦業（01818）

姚午齊上周三吼中嘅招金礦業尋日一枝獨秀，高見34.5元，相比推介日低位31.8元，有超過8%進帳。

信利國際（00732）

Sammi周一揀中隻信利國際尋日逆市向上，高見2.15元，較推介當日低位2元，累計升近8%。