太子手記:任總教識郭樹清抽水

內地同香港話就話愈嚟愈融合,其實好多做法及用語都有自己嘅一套,同本土文化好有關係。尋日建行(00939)董秘陳彩虹,就講咗一個好好嘅例子畀太子聽。

原先覺意思負面

香港人講嘢好直接,集資就稱為「抽水」,點知建行董事長郭樹清覺得香港傳媒用「抽水」形容集資好負面。好彩香港金融專家任志剛舊年加入咗建行做非執董,經「任總」把口講解吓,郭董明白咗廣東話用抽水形容集資係中性詞,依家已經唔介意話自己抽水。

建行成功「抽水」超過600億元,陳彩虹話係舊年三大事件之一,另一件大事就係董事局換屆,包括前金管局總裁任志剛加盟。

陳彩虹同太子講,任總入局之後,最大貢獻就係提供風險管理意見,另一件就係向建行提供香港人民幣市場睇法。太子認識嘅任總,最緊要係啲數字有幾穩陣兼可信,集中睇住啲風險就最啱佢,兼且佢對人民幣呢個市場熟到不得了。

建行今個月就派舊年嘅業績表,陳彩虹已經同大家講定,第三件大事就係建行上年賺咗好多錢,股東聽到建行賺大錢係上年大事之一,應該好開心。

跨媒體地產網新居入伙 幾萬個精選樓盤 歡迎睇樓!

Money18新功能「18好路數」為你預測心水股票升跌機會率