市場徐想：科技股優勢仍存在
阿里巴巴（01688）因涉及「搵人笨」事件，令公司兩大巨頭「走人」，從而令股價受壓，科技股同樣受拖累，作為一個教授電子商貿超過十年嘅「學者達人」，筆者對科技股總係有一份情意結，分析之下，覺得科技股嘅優勢，喺大方向上仍然存在。
依家嘅科技股包含部分全球最知名嘅創新品牌，例如蘋果公司（Apple）、谷歌（Google）同甲骨文（Oracle）等等，呢個板塊裏面大多數係管理優良、資產負債表強健而且營收穩定嘅公司。
當企業有意通過科技投資嚟提升產能進而削減單位成本嘅時候，科技股就係最大嘅受益人。科技股亦都有唔錯嘅防禦性。科技行業唔單只有創造現金嘅能力，而且公司對盈利增長同擴張都好重視。智慧型手機、平板電腦等新科技消費品嘅推出，加上科技替換周期嘅驅動力量，應可進一步降低經濟衰退對科技需求嘅衝擊。