短炒倉：首都創投小注炒折讓

昨日港股市況頗有點恐慌性的味道，雖然恒指只係跌300點，但跌幅榜上，不少基金股都榜上有名，而一些上午做好的股份，隨即惹來沽盤而要倒跌收場，一句講晒，就係基金要錢唔要貨。

首都創投（02324）係尋日難得仍錄得升幅的股份之一，收市升4%，報0.385元。集團主要從事上市及非上市公司投資業務，截至去年底止，手上主要持有的本地上市股份包括仁智（08082）、朗力福（08037）、新確科技（01063）等。

日前剛公布了截至去年底止的中期業績，錄得純利4,052萬元，增長16%，每股盈利12.52仙。另外，集團正進行2供1供股，供股價0.3元，集資淨額約5,630萬，擬用作未來可能投資及營運，供股權（02990）將於今日上板。

據集團公布，截至上月底其每股資產淨值為0.96元，按2供1後NAV變成0.64元計，即現價折讓達四成，而供股價則折讓53%。早輪永義實業（00616）隻「威士」上板都炒到出煙，故首都創投「威士」上板要密切留意，亦可望對首都創投股價帶來支持，以較NAV折讓收窄至三成計，正股目標可睇0.45元，止蝕0.35元。

首都創投（02324）目標價：0.45元 止蝕價：0.35元