股海實戰：聯想靜候機會執平貨

呢幾日阿莊不斷提及，周五期指結算前不宜輕舉妄動，果然尋日股海就上演大屠殺，唔少強勢股股價好似「倒水」咁掉頭急瀉，經緯紡機（00350）挫19%、MI能源（01555）跌13%、中國無線（02369）及玖紙（02689）分別跌11%及10%，隻隻成交額都過億元。正月都未過完，金魚缸經已大走樣，真係擔心今年股市會唔會由頭「兔」（吐）到落尾！

尋日市況為咩殺得咁急，有指係證券行CALL孖展，但阿莊所見帶頭沽貨嘅都係大盤主導，反而似係有表叔「火車盤」要沽貨離場，呢一個現象必須要重視，因為若然沽貨套現潮由股市蔓延至樓市，就真係大大鑊！

料下試250日線

至於尋日跌市，恒指曾低見22,575點，收報22,601點，跌305點，大市成交714億元。即月高水48點，三月期指則低水27點，成交張數分別達到8.7張萬及7.1萬張。內地A股反而靠穩，滬綜指收報2,878點，升15點，但無助港股回穩。本來估計恒指喺22,400點水平有望呈雙底，但經過早日一役，恐怕呢個位好快失守，向下要睇250日線21,900點，各位要自求多福！

見前晚美股再度低收，港股又彈唔起，阿莊尋日上晝都忍唔住手入場沽貨增持現金，以平均價6.5元沽出信義玻璃（00868）15萬股，另按平均價每股4.25元沽出20萬股中航科工（02357），二者合共套現181萬元，賺15.7萬元，總之持貨鎖定利潤避避風頭。

沽完貨冇嘢好做，同其他股友一齊睇住公仔箱聽財爺「廢噏」﹗今年份財政預算案被市民罵得落花流水，原因係好似使咗唔少錢，但其實並無助於紓解民困。呢期外圍局勢不穩，全因為「民怨」積壓甚深，係喺嘅環境之下，特區政府並唔缺錢，卻發表一份超廢嘅財政預算案，搞到民怨載道，政治觸覺真係捧蛋！

留意A股市場變化

那邊廂睇睇石油國嘅做法，英國傳媒報道，為防茉莉花革命燒到埋身，沙特阿拉伯宣布一套財政補貼措施，總值料達360億美元，旨在化解民眾怨恨，當中包括公務員即時加薪15%，以抵銷通脹，並承諾喺一四年底前投入四千億美元改善民生。講開又講，過去一個月國際形勢起了較大變化，適逢又喺中國兩會前夕，投資者都在關注中央會否有何應變措施以穩民心，短期要繼續密切留意A股市場變化。

依家並未到入金魚缸撈貨嘅時候，有好嘢都應該暫以觀望為主，別心急入市。聯想（00992）上周被IBM悉售4.36億股，每股作價4.7元，聽聞基金認購反應踴躍，原因主要係IBM唔係第一次沽售聯想股份，沽售行動非關聯想基本因素。反觀聯想業務已回復盈利能力，且競爭能力比金融海嘯前嘅狀態更佳，所以即使身處淡市，長線基金仍願意入飛接貨。

聯想股份喺4.5元樓下，可以跟進大股東去年中嘅增持行動，入市分注收集，呢個睇法至今未有大改變，只係因應市況變化，如今急也急不來，繼續駐足觀望，耐心等候行動機會。

戰報

中國水業（01129）

Sammi上周四推介嘅中國水業成為逆市奇葩，尋日搶高至0.159元，較推介日低位0.136元，累積升幅近17%。

中星集團（00055）

錢進周一推介中星集團，當日低位只係0.33元，尋日股份逆市向上，抽上高位0.36元，幾日累升逾9%。