裁縫大王睇中永義錢多
永義（00616）最近被「狙擊」，印度裔裁縫Raja M. Daswani密密吸永義股份，據佢喺報紙登嘅公告，佢已經持有永義28.07%股份，正考慮同一致行動人士作出自願性全面收購建議，講明未接觸過永義董事會。太子傳媒老友尋日走訪呢位裁縫大王，佢話對於全面收購要約仲係未ready，對於其他細節就三緘其口。
尋日永義出通告，話仲未開始磋商。Daswani尋日坐鎮舖頭，老友即時問佢接觸咗永義未？佢話no idea，唔係自己嘅責任。對於未來會唔會再增持、家吓股價仲抵唔抵買，佢都唔答。佢鍾意永義資金多、物業充裕，所以先會買股票。
對紡織甚具認識
原本經營縫紉嘅Daswani對紡織業都好有認識，佢喺深圳同香港都有業務，出口去全世界。佢間舖叫Raja，係帝王咁嘅意思，所以佢有個中文暱稱叫「大王」。
Daswani着住自家製嘅西裝影相。