股海實戰：信義玻璃穩坐釣魚船

上周五收市後，人行宣布調高存款準備金率，舉動喺市場預期之內，滬綜指上周五回落27點，收報2,899點，某程度亦已預先反映消息。至此，相信呢輪中央調控樓市及控制通脹嘅相關措施已近尾聲，兩會前內地股市持續靠穩的話，短期港股呈雙底回升嘅可能性亦增加。

睇番港股，上周恒指成功考驗23,000點關承接，上周五收報23,595點，升293點，大市成交788億元。美股繼續尋底，上周五道指以全日高位12,391點收市，升73點，但阿莊始終覺得，美股現水平距離調整期不遠。

滙豐控股（00005）喺業績前股價迭創五十二周新高，上周五一度高見91.9元，收報91.75元，升1.1%，成交達到45.91億元，當日該股沽空額僅3.6億元，今鋪升勢幾似樣，似乎與重登「紅底股」之列嘅目標不遠。究竟滙控與和黃（00013）邊隻股價最先破百，已成為阿莊茶餘飯後與股友談論嘅話題，牙骹戰演變成注碼為一餐午飯嘅賭局，希望年中前可以分出勝負！

講開又講，上海與巴西交易所簽訂協議，兩地上市公司可以互相在對方市場掛牌，港交所（00388）應該感到壓力。此外，有消息指，上海將於今年推出國際版，若然屬實，滙控頗大機會成為首批掛牌嘅股份，對股價表現有一定嘅刺激作用。

內地3G產業發展迅速，三大電訊商之一嘅聯通（00762）憑着iPhone熱賣及3G服務需求增加，一月份嘅3G用戶淨增140萬戶，創下歷來新高，難怪股價做好，上周五一度逼近五十二周高位，全日高位13.62元，收報13.46元。

同樣受惠3G業務增長嘅香港流動電話商數碼通（00315），股價升勢亦停不了，上周五股價一口氣升7.2%，收報26.8元，公司將於本周三宣布中期業績。唔經唔覺，今年以來數碼通股價累計升幅最多達91%，揸住佢真係完全唔覺期間出現過跌市。反觀同樣喺香港做3G業務嘅和電香港（00215），同期累計升幅只有26%，相對而言係大落後，可以高度關注。

一拖股價完成調整

阿莊持有嘅中芯國際（00981），上周宣布去年末季業績，錄得盈利6,800多萬美元，未有令股東失望，亦再次顯示新管理層有能力令公司重建持續性嘅盈利能力，阿莊一於繼續捧場。另1隻持股第一拖拉機（00038），上周五有大盤入場掃貨，股價一洗頹風，收報8.37元，升8.8%，成交7,989萬元。一口氣重上8元樓上，估計今浪調整已完成，可以再坐一會。

講開組合股份，又睇埋隻信義玻璃（00868），公司將於下周一宣布末期業績，受惠內地汽車業蓬勃發展，以及全球環保節能大趨勢下，對超白光伏玻璃需求增加，去年上半年公司收益同比急增逾六成，至26.48億元，純利增長1.8倍至6.41億元，相信全年計純利可望創出歷史新高。

再睇近期大市調整，信義股價走勢未見有太大沽壓。事實上，該股現價今年預測市盈率僅十至十一倍，若嚟緊公布嘅一○年度業績消息對辦，股價重估潛力甚大，可以穩坐釣魚船，靜候佳音！

戰報

中海油服（02883）

中海油服近日破位而上，上周五高見16.16元，較姚午齊本月十一日介紹時低位13.68元，累計升超過18%。

新環保能源（03989）

錢進上周五推介的新環保能源即日落鑊，最高升抵0.57元，吼中於低位0.51元上車，即日炒轉都賺近12%。