樓市八爪魚：入貨放租等兩年博升

「元宵佳節都已經過埋，但係樓市成交仍然只係緩慢回升，大家所期待嘅『小陽春』，唔通真係輕輕的來，悄悄的走咗？」三個月前趁市靜入咗貨嘅Gilbert兄，最近同Paul少飯局嘅時候，就不禁有咁嘅疑問。

「Gilbert兄，你最近買嗰兩件貨，都已經畀政府變相set咗兩年『禁售期』，除非個價喺兩個月內勁升超過三成，否則你老哥都好難賺住沽貨喇。咁又何需再諗咁多短期市況呢？」Paul少不忘「提醒」一下Gilbert兄，佢嗰兩件新貨嘅status（狀況）。

「我一心都係買嚟收番幾年租，當然唔會擔心短期市況喇；依家只係諗，個市慢番少少，會唔會租務又會旺番啲，等我唔使丟空多幾個月啫。」

住宅租金高 市民難頂

Gilbert兄嘅諗法，其實都係好多近期入貨嘅投資者嘅共同心態。講到租市，近排就有市場人士分析話，政府喺去年十一月出招之後，好多投資者「短炒變長揸」，加埋唔少人好似Gilbert兄咁，買樓收租對抗銀紙貶值，令到租盤供應多咗，租金或者會有壓力回落。老實講，Paul少都覺得依家住宅租金真係幾高，好多小市民租樓負擔都好重。

但係，Paul少對於租金回落就有啲保留。其實近年租務市場嘅生態，同以往好唔同，純粹持有作長線收租（即係五年期或以上）嘅投資者，數目愈嚟愈少，反觀市場大部分嘅收租客，好多都係睇兩至三年嘅投資期，即係大約一個至個半租期；租到咁上下，就會沽貨賺取利潤。對佢哋嚟講，樓價升值所賺到嘅，先至係真正嘅「大茶飯」。

所以，喺新供應進入市場嘅同時，其實亦都有唔少現有租盤「close file」，尤其近年樓價升得快，情況就更加顯著。相信唔少朋友都遇過，租咗樓一年多啲，就因為業主要賣樓而「迫遷」。Paul少相信，只要個市唔逆轉，呢個情況都會持續落去，所以如果全年拉勻計，市場租盤嘅數量，其實係好steady（穩定）嘅。

單位丟空 豪客「唔志在」

至於內地豪客買樓，對租盤供應量嘅影響，其實亦唔會好大。雖然內地客依家佔咗住宅樓市嘅成交，起碼都有一至兩成，但係佢哋並非個個都係「收租客」心態，趕住收租去「冚息」。

對於佢哋嚟講，空置咗亦唔覺得係乜嘢損失，咁樣可能仲更加方便賣樓，亦唔會畀租客住殘咗。周董就曾經話過畀Paul少聽，大型屋苑裏面，唔少「有匙引看」嘅「吉盤」，其實都係由內地客持有，好多一放就已經放咗一年半載，但係就點都唔考慮租出去，所以內地人嚟香港買樓，雖然已經興咗好幾年，但係市場就好少話佢哋對個租市造成衝擊。